By DMG / 2024 April 24
ရခိုင်ပြည်၊ စစ်တွေအကျဉ်းထောင်မှ ဘင်္ဂလားဒေ့ရှ်နိုင်ငံသား ၁၇၃ ဦးကို ဘင်္ဂလားဒေ့ရှ်အာဏာပိုင်များထံသို့ စစ်ကောင်စီက လွှဲပြောင်းပို့ဆောင်ခဲ့ကြောင်း မြန်မာနိုင်ငံဆိုင်ရာ ဘင်္ဂလားဒေ့ရှ်သံရုံး ထုတ်ပြန်ချက်အရ သိရသည်။
မြန်မာရေတပ်သင်္ဘောချင်းတွင်း(Chin Dwin)ဖြင့် ဧပြီ ၂၃ ရက်က ပို့ဆောင်ခဲ့ပြီး အဆိုပါသင်္ဘောသည် ယနေ့ ဧပြီ ၂၄ တွင် ဘင်္ဂလားဒေ့ရှ်ပိုင်နက်သို့ ရောက်ရှိမည်ဖြစ်ကာ သက်ဆိုင်ရာအာဏာပိုင်များထံ လွှဲပြောင်းပေးအပ်မည်ဟု သံရုံးထုတ်ပြန်ချက်က ဆိုသည်။
အပြန်ခရီးတွင် ရခိုင်တိုက်ပွဲများကြောင့် နယ်စပ်ဖြတ်ကျော်ပြီး ဘင်္ဂလားဒေ့ရှ်နိုင်ငံထဲ ထွက်ပြေးနေသည့် စစ်ကောင်စီတပ်ဖွဲ့ဝင်များကို ပြန်လည်ခေါ်ဆောင်လာမည်ဖြစ်ကြောင်း သိရသည်။
ဘင်္ဂလားဒေ့ရှ်အာဏာပိုင်များထံ လွှဲပြောင်းလိုက်သော အကျဉ်းသားများထဲတွင် ကော့ဘဇားခရိုင်မှ ၁၂၉ ဦး၊ ဘန်ဒါဘန်ခရိုင်မှ ၃၀ ဦး၊ Rangamati ခရိုင်မှ ၇ ဦး၊ Khagrachari ခရိုင်၊ Noakhali ခရိုင်၊ Narayanganj ခရိုင်၊ Chattogram ခရိုင်၊ Rajbari ခရိုင်၊ Narshingdi ခရိုင်နှင့် Nilphari ခရိုင်တို့မှ ၁ ဦးစီ ပါဝင်သည်။
အကျဉ်းကျခံနေရသူ ၁၄၄ ဦးနှင့် တရားရင်ဆိုင်နေဆဲ ၂၉ ဦးဖြစ်ပြီး ရန်ကုန်ဘင်္ဂလားဒေ့ရှ်သံရုံး တာဝန်ခံနှင့် ဘင်္ဂလားဒေ့ရှ်ကောင်စစ်ဝန်ရုံးမှ ကိုယ်စားလှယ်များ စစ်တွေမြို့တွင် တွေ့ဆုံဆွေးနွေးပြီးနောက် ဘင်္ဂလားဒေ့ရှ် အာဏာပိုင်များထံ လွှဲပြောင်းပေးခဲ့ခြင်းလည်း ဖြစ်သည်။
ဓာတ်ပုံ – Bangladesh Embassy Yangon in Myanmar
https://www.facebook.com/dmgnewsagency/posts/826424696197795