■ ရိုဟင်ဂျာများအပေါ် ကျူးလွန်သည်ဆိုသော စွပ်စွဲချက်များနှင့် ပတ်သက်ပြီး အေအေဘက်မှ တုံ့ပြန်ဖြေကြားချက် (ဒုတိယပိုင်း)

By DMG / 2024 May       31

ပုံစာ – အာရက္ခတပ်တော် (AA) ၏ တပ်မှူးချုပ်ဖြစ်သလို ရက္ခိုင်အမျိုးသားအဖွဲ့ချုပ် (ULA) ၏ ဥက္ကဌလည်းဖြစ်သူ ဗိုလ်ချုပ်ထွန်းမြတ်နိုင်။ ဓာတ်ပုံ – Reuters

The New Humanitarian – အေအေဟာ ရိုဟင်ဂျာအမျိုးသား ရာပေါင်းများစွာကို သူတို့ဆီမှာ အတင်းအကြပ် စစ်မှုထမ်းခိုင်းနေတယ် ဆိုပြီးတော့လည်း စွပ်စွဲခံထားရပါတယ်။ ဒီပြောဆိုချက်တွေကို အေအေ လက်ခံပါသလား။ ဒါမှမဟုတ်လည်း မမှန်ဘူးလို့ ယူဆပါသလား။

■ ULA/AA – အေအေဟာ လက်ရှိအချိန် မြန်မာနိုင်ငံမှာ လူအင်အားနဲ့ ပတ်သက်ရင် အကြီးမားဆုံး အာဏာပိုင် လက်နက်ကိုင် အဖွဲ့အစည်း (de facto state-armed organisation) ဖြစ်ပါတယ်။ အရင်က ပြောခဲ့ဖူးသလိုပဲ ကျနော်တို့မှာ ထောင်ပေါင်းများစွာသော အရန်အင်အားတွေကို ထည့်မတွက်ဘဲ လက်ရှိ တိုက်ခိုက်ရေး တပ်ဖွဲ့ဝင်အရေအတွက်ဟာ ၄၀,၀၀၀ နီးပါးရှိပါတယ်။ ကျနော်တို့မှာ စေတနာ့ဝန်ထမ်းနဲ့ အချိန်ပြည့် စစ်မှုထမ်းဖို့အတွက် လုံလောက်တဲ့ လူသားအရင်းအမြစ် ရှိထားတယ်လို့ ဆိုလိုရင်း ဖြစ်ပါတယ်။

ဒါကြောင့် မွတ်ဆလင်ဒေသခံတွေ ဒါမှမဟုတ် အခြားသော အသိုင်းအဝိုင်းက ပြည်သူတွေကို အတင်းအကြပ် စစ်မှုထမ်းခိုင်းတယ် ဆိုတဲ့ သတင်းတွေဟာ ယုတ္တိမတန်သလို အခြေအမြစ်လည်း မရှိပါဘူး။ အပေါ်မှာ ရှင်းပြခဲ့သလိုပဲ ဒါဟာ ကျနော်တို့ အရာရှိတွေက မွတ်ဆလင်ဒုက္ခသည်စခန်းက လူတွေကို ပဋိပက္ခဖြစ်ပွားရာ နေရာတွေမှာရှိနေတဲ့  မြို့တွေနဲ့ ကျေးရွာတွေဆီ ပြန်မသွားကြဖို့ တိုက်တွန်းနေချိန်မှာ အဓိပ္ပာယ်ကောက်ယူမှု လွဲသွားတဲ့ ပြဿနာတစ်ရပ်လည်း ဖြစ်နိုင်ပါတယ်။

အရပ်သားပြည်သူလူထုရဲ့ လုံခြုံရေးကို အကာအကွယ်ပေးဖို့ တာဝန်ရှိတဲ့ အာဏာပိုင်တစ်ရပ် ဖြစ်သည်နှင့်အညီ ULA ဟာ ပြည်နယ်ရဲ့ အခြားနေရာတွေမှာပါ ရှိနေတဲ့ အသိုင်းအဝိုင်းအားလုံးကိုပါ ကျနော်တို့ရဲ့ ထိန်းချုပ်မှုအောက်မှာ ရှိတဲ့ လုံခြုံတဲ့နေရာတွေမှာပဲ ခိုလှုံကြဖို့ အလားတူ ညွှန်ကြားချက်တွေကို ထုတ်ပြန်ပေးနေတာ ဖြစ်ပါတယ်။ သို့သော်လည်း အတင်းအကြပ် စစ်သားစုဆောင်းတယ် ဆိုတဲ့ စွပ်စွဲချက်တွေကို သက်သေပြနိုင်တဲ့ ယုံကြည်ရတဲ့ အထောက်အထားတွေသာ ရှိခဲ့မယ်ဆိုရင် ကျနော်တို့ဘက်က ဖြေရှင်းဖို့ အဆင်သင့် ရှိပါတယ်။ ကျနော်တို့ကို အချိန်မရွေး ဆက်သွယ်နိုင်ပါတယ်။

လက်ရှိ ကျနော်တို့ ထိန်းချုပ်ထားတဲ့ ဒေသတွေမှာ နေရပ်စွန့်ခွာ တိမ်းရှောင်လာသူ မွတ်ဆလင် ၂ သိန်းကျော် ရှိပါတယ်။ သူတို့အတွက် ကျနော်တို့မှာရှိသမျှ လုံခြုံရေး၊ အမိုးအကာ၊ စားနပ်ရိက္ခာ၊ ဆေးဝါးနဲ့ အဝတ်အစားတွေကို ထောက်ပံ့ပေးနေပါတယ်။ လူသားချင်းစာနာမှု အကူအညီတွေ ပေးအပ်နေသူတွေအနေနဲ့ ဒီအရေးပေါ်ကိစ္စအတွက် ပိုမိုအလေးထားပေးကြဖို့ ကျနော်တို့ တောင်းဆိုချင်ပါတယ်။

နောက်တစ်ချက် ထောက်ပြချင်တာက ကျနော်တို့ရဲ့ ရဲဌာန၊ တရားစီရင်ရေးနဲ့ အရပ်ဘက်အုပ်ချုပ်ရေးတွေမှာ မွတ်ဆလင်အဖွဲ့ဝင်တွေ ရှိနေတယ်ဆိုတာ အမှန်ပဲဖြစ်တယ် ဆိုတာပါ။ ကျနော်တို့ရဲ့ အုပ်ချုပ်ရေးမှာ ဒေသခံအသိုင်းအဝိုင်းရဲ့ ပူးပေါင်းပါဝင်မှုကို တိုးမြှင့်ပြီး ULA နဲ့ သက်ဆိုင်ရာ မွတ်ဆလင်အသိုင်းအဝိုင်း အကြားမှာ အပြန်အလှန်ယုံကြည်မှု တည်ဆောက်နိုင်ရေးအတွက် ဒီမူဝါဒကို ကျနော်တို့ ကျင့်သုံးနေတာ ဖြစ်ပါတယ်။ လူမျိုး၊ ဘာသာ၊ တိုင်းရင်းသား မခွဲခြားဘဲ သူတို့ရဲ့ အရည်အချင်းနဲ့ သစ္စာစောင့်သိမှုတို့အပေါ် မူတည်ပြီး နိုင်ငံသားတွေကို ကျနော်တို့ရဲ့ အုပ်ချုပ်ရေးယန္တရားမှာ ရွေးချယ်ခန့်အပ်ရေးဟာလည်း ကျနော်တို့ရဲ့ မူဝါဒပဲ ဖြစ်ပါတယ်။

■ The New Humanitarian – မကြာသေးခင်ကမှ အေအေခေါင်းဆောင်တွေဟာ ဘင်္ဂလားဒေ့ရှ် လူမျိုးတွေ၊  ဘင်္ဂါလီတွေဆိုပြီး အွန်လိုင်းပေါ်မှာ ထပ်တလဲလဲ ရည်ညွှန်းသုံးနှုန်းလာတာကို တွေ့ရပါတယ်။ ဒါဟာ မြန်မာအစိုးရ အဆက်ဆက်က ဆယ်စုနှစ်ပေါင်းများစွာ စွပ်စွဲလာခဲ့တဲ့ ‘ရိုဟင်ဂျာဆိုတာ ဘင်္ဂါလီတွေသာဖြစ်ပြီး မြန်မာနိုင်ငံရဲ့ နိုင်ငံသားဖြစ်ခွင့် ပြည့်မီသူတွေ မဟုတ်ဘူး’ ဆိုတဲ့ ပြောကြားချက်တွေအတိုင်း ပြုမူလာတာ ဖြစ်တယ်လို့ ရိုဟင်ဂျာတချို့က ရှုမြင်ကြပါတယ်။ ဒီပြောဆိုချက်တွေကို အေအေက ဘယ်လိုတုံ့ပြန်ချင်ပါသလဲ။ ဘင်္ဂါလီတွေ၊ ဘင်္ဂလားဒေ့ရှ်လူမျိုးတွေ ဆိုပြီး အေအေခေါင်းဆောင်တွေနဲ့ အွန်လိုင်းမှာ သူတို့ကို ထောက်ခံအားပေးသူတွေက ကိုးကားပြောဆိုနေကြခြင်းရဲ့ နောက်ကွယ်မှာရှိတဲ့ ရည်ရွယ်ချက်က ဘာဖြစ်မလဲ။

■ ULA/AA – အာရကန်ဒေသရဲ့ မွတ်ဆလင်ပုစ္ဆာကို ဖြေရှင်းဖို့ ကြိုးစားရာမှာ ကျနော်တို့ ကြုံတွေ့လာရတဲ့ ပြဿနာရဲ့ အစိတ်အပိုင်းတစ်ရပ်ကတော့ ပုံသွင်းပြောကြားခြင်းနဲ့ ချဲ့ကားပြောဆိုခြင်း ဖြစ်ရပ်တွေပါ။ ‘ဘင်္ဂလားဒေ့ရှ်လူမျိုးတွေ’ ဆိုတာဟာ ဘင်္ဂလားဒေ့ရှ်နိုင်ငံသားတွေကို ဆိုလိုမှန်း၊ နိုင်ငံရေးဆိုင်ရာ အမှတ်အသားသရုပ်တစ်ခုကို ဆိုလိုမှန်း သာမန်လူတစ်ယောက်တောင် နားလည်နိုင်ပါတယ်။ ‘ဘင်္ဂါလီတွေ’ လို့ပြောဆိုတာဟာလည်း လူမျိုးစု သို့မဟုတ် ဘင်္ဂါလီ ဘာသာစကားကို ပြောဆိုကြတဲ့ အသိုင်းအဝိုင်းက ပြည်သူတစ်ယောက်ကို ရည်ညွှန်းလိုရင်း၊ ယဉ်ကျေးမှုဆိုင်ရာ အမှတ်အသား လက္ခဏာတစ်ခုကို ဆိုလိုရင်းဖြစ်ပါတယ်။

ဘင်္ဂါလီမျိုးနွယ်စုဝင်ဖြစ်ပြီး နိုင်ငံသားအခွင့်အရေး အပြည့်အဝ ရရှိနေကြတဲ့ အိန္ဒိယနိုင်ငံသားတွေလည်း သန်းပေါင်းများစွာ ရှိနေတာပါပဲ။ နောက်တစ်ဘက်မှာဆိုရင် ဘင်္ဂလားဒေ့ရှ်မှာလည်း သူ့နိုင်ငံသား ဖြစ်နေတဲ့ ရခိုင်တိုင်းရင်းသားတွေ ရှိပါတယ်။

ကျနော်တို့ရဲ့ ထုတ်ပြန်ချက်တစ်ရပ်ထဲမှာ ရခိုင်တွေဟာ ဘင်္ဂလားဒေ့ရှ်နိုင်ငံရဲ့ အစိတ်အပိုင်းတစ်ရပ် ဖြစ်သလို ဘင်္ဂါလီတွေဟာလည်း အာရကန်နိုင်ငံရဲ့ အစိတ်အပိုင်းတစ်ရပ် ဖြစ်တယ်လို့ လူသိရှင်ကြား ထည့်သွင်းဖော်ပြခဲ့ပြီးသားပါ။ ဒါဟာ လေ့လာသူတိုင်း ရှင်းရှင်းလင်းလင်း နားလည်နိုင်တဲ့ အရိုးရှင်းဆုံး အမှန်တရားလို့ ကျနော်တို့ ယုံကြည်ပါတယ်။

တစ်ချိန်တည်းမှာပဲ ဗမာစစ်တပ်နဲ့ အစိုးရဟာ မွတ်ဆလင်ဒေသခံတွေကို ‘ဘင်္ဂါလီတွေ’ လို့ ရည်ညွှန်းသုံးနှုန်းပြီး ဘယ်လိုဖိနှိပ်ခဲ့တယ် ဆိုတာကိုလည်း ကျနော်တို့ နားလည်ပါတယ်။

ကျနော်တို့အတွက်ကတော့ ဒါဟာ တော်တော်ကြီးကို ဆန့်ကျင်ဖက်ဖြစ်ပါတယ်။ ဗြိတိသျှတွေ ဘင်္ဂလာ (Bengal) ကနေ အာရကန်ကို အုပ်ချုပ်တဲ့ ကာလတုန်းက လူအစုလိုက်အပြုံလိုက် ဝင်ရောက်လာမှုတွေနဲ့ ပတ်သက်တဲ့ ပင်ရင်း သက်သေအထောက်အထား (Primary Evidence) တွေကို ဘယ်သူမဆို အလွယ်တကူ ရှာဖွေနိုင်ပါတယ်။ တစ်ချို့သော အထောက်အထားတွေမှာ ဆိုရင်လည်း ကိုလိုနီခေတ်လွန် ကာလတွေ၊ အထူးသဖြင့် ဘင်္ဂလားဒေ့ရှ်နိုင်ငံရဲ့ လွတ်လပ်ရေးတိုက်ပွဲကာလအတွင်းမှာ အာရကန်ဒေသကို လူ သိန်းပေါင်းများစွာ ရွှေ့ပြောင်းဝင်ရောက်ခဲ့ကြတာကို ဖော်ပြထားတာတွေ ရှိပါတယ်။

ဒါကြောင့်ပဲ ဘာအတွက် လူတစ်စုက ‘ဘင်္ဂါလီ’ လို့မသုံးပဲ ‘ရိုဟင်ဂျာ’ ဆိုပြီး ရည်ညွှန်းသုံးနှုန်းနေကြတာလဲ ဆိုတာကို သဘောပေါက်ဖို့ လိုအပ်တာ ဖြစ်ပါတယ်။

* [အောက်တွင် ဖော်ပြထားသည့် ဖြေကြားချက်များသည် ULA/AA-HQ က ၎င်းတို့၏ ဖြေကြားချက်များကို ဖော်ပြရာတွင် နောက်ဆုံးစာမျက်နှာ မပါဝင်သေးကြောင်း ထောက်ပြခဲ့ပြီးနောက်မှ မေလ ၃၀ ရက်နေ့တွင် The New Humanitarian က ဝဘ်ဆိုက်စာမျက်နှာတွင် ထပ်မံဖြည့်စွက် ဖော်ပြထားခြင်း ဖြစ်ပါသည်။]

သူတို့ကိုယ်သူတို့ နောက်နာမည်တစ်မျိုးနဲ့ ပုံဖော်ခြင်းအားဖြင့် ကိုလိုနီခေတ်က ရွှေ့ပြောင်းနေထိုင်မှု အထောက်အထားကို ပယ်ဖျက်ရာရောက်သလို ဌာနေတိုင်းရင်းသား လူမျိုးစုတစ်ခုအဖြစ်လည်း တောင်းဆိုနိုင်မယ်လို့ မရိုးဖြောင့်တဲ့ မွတ်ဆလင်အများအပြားက၊ အထူးသဖြင့် ပြည်ပရောက် မွတ်ဆလင်တွေနဲ့ ထိပ်ပိုင်း (Elite) အသိုင်းအဝိုင်းမှာရှိတဲ့ မွတ်ဆလင်တွေထဲက ယုံကြည်ကြပါတယ်။ ဒေသခံ ဌာနေတိုင်းရင်းသား လူထုရဲ့ အမြင်မှာကျတော့ ‘ရိုဟင်ဂျာ’ ဆိုတာ ကျနော်တို့ မျိုးရိုးစဉ်ဆက်သမိုင်းရဲ့ တည်တံ့ခိုင်မြဲမှုကို ဖျက်ဆီးပြီး အဖရခိုင်ပြည်ကနေ ခွဲထွက်မယ့် နိုင်ငံရေးလှုပ်ရှားမှုတစ်ရပ်သာ ဖြစ်ပါတယ်။

ဒါဟာ အလွန့်အလွန်ကို သစ္စာမဲ့ပြီး မရိုးသားတဲ့ လုပ်ရပ်လို့ ကျနော်တို့ မြင်ပါတယ်။ သို့သော်ငြားလည်း ‘ရိုဟင်ဂျာ’ ဆိုတဲ့ ဝေါဟာရကို ကျနော်တို့ ဘယ်တော့မှ အသိအမှတ်မပြုဘူးလို့ ဆိုလိုခြင်းတော့  မဟုတ်ပါဘူး။

သူတို့အနေနဲ့ ဒီဒေသတွင်းက အခြားသော လူမှုအသိုင်းအဝိုင်းတွေကို ထိခိုက်နစ်နာစေပြီး နိုင်ငံရေးရည်ရွယ်ချက်နဲ့ လုပ်ကြံဖန်တီးထားတဲ့ သမိုင်းတွေကို ပယ်ဖျက်ပေးရမှာ ဖြစ်တဲ့အပြင် ကိုလိုနီခေတ် ရွှေ့ပြောင်းနေထိုင်မှုဆိုင်ရာ သမိုင်းအချက်အလက်တွေကိုပါ ဝန်ခံဖို့ ကျနော်တို့ လိုလားပါတယ်။ ဒါ့အပြင် တစ်ချိန်တည်းမှာပဲ အာရကန်မှာ လက်ရှိနေထိုင်နေကြတဲ့ မွတ်ဆလင်တွေ အနေနဲ့လည်း ကိုလိုနီခေတ်မှာ ရောက်လာကြသူတွေ ဒါမှမဟုတ်လည်း ကိုလိုနီခေတ်လွန်မှာ ပြောင်းရွှေ့အခြေချလာကြသူတွေရဲ့ မျိုးဆက်တွေ ဖြစ်နေခဲ့မယ် ဆိုရင်တောင် နိုင်ငံသားဖြစ်ခွင့် တောင်းခံနိုင်တဲ့ တရားဝင်အခွင့်အရေး ရရှိသင့်တယ် ဆိုတာကိုပါ ကျနော်တို့ နားလည်ပါတယ်။

အာရကန်ဒေသမှာ နေထိုင်ကြသူတွေ အားလုံးအတွက် နိုင်ငံသားအခွင့်အရေးနဲ့ လူ့အခွင့်အရေးကို တန်းတူညီမျှ အကာအကွယ်ပေးမယ့် ULA အာဏာပိုင်အဖွဲ့ရဲ့ သန္နိဋ္ဌာန်ကတော့ ဘယ်တော့မှ ယိမ်းယိုင်သွားမှာ မဟုတ်ပါဘူး။

■ အင်တာဗျူးအပြည့်အစုံ > https://www.dmgburmese.com/အင်တာဗျူး/newhumaa.html

https://www.facebook.com/dmgnewsagency/posts/849881823852082

Leave a Reply

Your email address will not be published.