By Arakan Princess Media / 2024 April 13
အာရက္ခတပ်တော်သိမ်းထားရေ ရမ်းဗြဲကို ဧပြီ ၁၃ ရက် နိ၊မိုးထပိုင်းမာအကြမ်းဖက်စစ်ကောင်စီက အငြိုးအတေး နန့်လက်နက်ကြီး (၁၉) ကြိမ် ထက်မနည်း ထပ်မံပိုက်ခတ်ခရေလို့ ဒေသခံတိက ပြောပါရေ။
အာရက္ခတပ်တော်(ရက္ခိုင့်တပ်တော်)က ၂၀၂၄ ခုနှစ်၊ မာ့ချ် ၁၁ ရက်နိမာ ရမ်းဗြဲမြို့ကို အပြီးသတ် သိမ်းပိုက်ထားစွာပါ။
ဒေနိ ဧပြီ ၁၃ ရက်နိ၊ မိုးထ ၉ နာရီလောက်ကစလို့ မွန်းတည့် ၁၂ နာရီအချိန်ထိ မာန်အောင်မြို့နယ် မြို့ချောင်းဝရွာအနားမာ ရောက်နီရေ အကြမ်းဖက်စစ်ကောင်စီ၏ ရီတပ်သင်္ဘောက ရမ်းဗြဲမြို့နယ်ဖက်သို့ အငြိုးအတေးကြီးမားစွာ လက်နက်ကြီးနန့် (၁၅) ကြိမ်ပစ်ခတ်ခပါရေ။
ယင်းအထဲက လက်နက်ကြီး ၂ လုံးစွာ ရမ်းဗြဲမြို့နယ်၊ ပုန်းဆိုးပြင်ရွာနားသို့ကျရောက်ပေါက်ကွဲပြီးကေ ဦးမောင်တင်ကြီးနီအိမ်ပျက်စီးလားရေလို့ သိရပါရေ။
ယင်းအပြင် အကြမ်းဖက်စစ်ကောင်စီ၏ လက်နက်ကြီးကျည်တိစွာ ရမ်းဗြဲမြို့နားကတောင်ကုန်းတိနန့် ရမ်းဗြဲမြို့နယ်၊ လက်ပံအညာရွာနားဟိ ဇီးဇောင်းတောင်နားတိသို့ ကျရောက်ပေါက်ကွဲခကြောင်းလည်း ဒေသခံတိက ဆိုပါရေ။
ရက္ခိုင်ပြည်တဝန်းမာ တပ်ရင်းဌာနချုပ်၊ တပ်မဌာနချုပ်တိ၊ တပ်စခန်းတိအမြောက်အမြားနန့်မြို့တိကို တခုပြီးတခု လက်လွှတ်ဆုံးယှုံးနီရရေ အကြမ်းဖက် စစ်ယှုံး စစ်ကောင်စီစွာ အာရက္ခတပ်တော်သိမ်းပိုက်ထားရေ မြို့၊ ရွာတိကို ရည်ရွယ်ချက်ဟိဟိ ပစ်မှတ်ထားလို့ လူမဆန်စွာ ဒရုန်း၊ ဂျက်ဖိုက်တာအပြင် လက်နက်ကြီးတိနန့် နိစဉ်ရက်ဆက် ပစ်ခတ်တိုက်ခိုက်နီပြီးကေ စစ်ရာဇဝတ်မှုတိကို ပြောင်ပြောင်တင်းတင်း လက်ရဲဇက်ရဲ ချိုးဖောက်ကျူး လွန်လျက် ဟိနီပါရေ။
https://www.facebook.com/arakanprincessmedia1/posts/448288257596134