By Arakan Princess Media / 2024 February 23
မောင်တောမြို့နယ်က စစ်ကောင်စီ၏ ရန်အောင်ပြင်ကင်း စခန်းကို ဒေနိ၊ ဖေဖော်ဝါရီ ၂၃ ရက်နိ၊နိခင်း ၁၂ နာရီ ၁၅ မိနစ်မာ ရက္ခိုင့်တပ်တော်က အပြီးသတ် သိမ်းပိုက်လိုက်ကြောင်း သတင်းထုတ်ပြန်ပါရေ။
ရက္ခိုင့်တပ်တော်စွာ ယင်းစခန်းကိုဒေနိ၊ မိုးထ ၇ နာရီ ၃၂ မိနစ်က စတင်ထိုးစစ်ဆင်ခပြီးကေ တရက်အတွင်း ၅နာရီ အကြာမာ အပြီးသတ် သိမ်းပိုက်လိုက်စွာ ဖြစ်ပါရေ။
ယင်းနည်းတူ ရန်အောင်ပြင် ပတ်ဝန်းကျင်ဟိ လက်ကျန်စခန်းတိကိုလည်း ဆက်လက်ထိုးစစ်ဆင်တိုက်ခိုက်သိမ်း ပိုက်လားဖို့လို့ ရက္ခိုင့်တပ်တော်က ဆိုပါရေ။
ယင်းပြင် မင်းပြားမြို့နယ်က တခုတည်းသော လက်ကျန်စခန်းဖြစ်တေ တိုင်းဗဟို(၉) လိကျင့်ရီးသင်တန်းကျောင်း ကို ခြောက်ရက်မြောက် ထိုးစစ်ဆင်တိုက်ခိုက်နီပြီးကေ၊ ပုဏ္ဏားကျွန်းမြို့နယ်က ခမရ(၅၅၀)ကိုလည်း ထိုးစစ်ဆင် တိုက်ခိုက်နီကြောင်း ရက္ခိုင့်တပ်တော်က ဖော်ပြပါရေ။
အလားတူ ပုဏ္ဏားကျွန်း၊ ရသေ့တောင်၊ ဘူးသီးတောင်၊ မောင်တောက လက်နက်ချ အညံ့မခံရေ အကြမ်းဖက် စစ်ကောင်စီ၏စစ်စခန်းတိကို ထိုးစစ်ဆင်တိုက်ခိုက်နီရေလို့လည်း ရက္ခိုင့်တပ်တော်က ထုတ်ပြန်ထားပါရေ။
https://www.facebook.com/arakanprincessmedia1/posts/420708290354131