By Arakan Princess Media / 2023 November 21
စစ်ကောင်စီက လူသားဒိုင်းကာနန့် ဓါးစာခံအဖြစ်ပြန်ပီးဆွဲထားရေ ပေါက်တောမြို့က ရဟန်း သံဃာ၊ သက်ကြီးရွယ်အို၊ အချေသူငယ်၊ ကိုယ်ဝန်ဆောင်အမျိုးသမီးတချို့အပါအဝင် အပြစ်မဲ့ဒေသခံပြည်သူ ၁၀၀ နီးပါးကိုအောင်မြင်စွာကယ်ထုတ်နိုင်ခကြောင်း ရက္ခိုင့်တပ်တော် AA က ဒေနိ(နိုဗမ်ဘာ ၂၁ ရက်နိ ) ညည့် ၉ နာရီ ၃၀ မိနစ်အချိန် ထုတ်ပြန်ပါရေ။
ထုတ်ပြန်ချက်အရ “ဒေနိနိခင်း ၁၂ နာရီ ၂ မိနစ်လောက်က ပေါက်တောမြို့အတွင်း နီရာတချို့နန့် လောကထိပ်ပန်ဘုရားကုန်းရို့မာ စစ်ကောင်စီတပ်နန့်ရက္ခိုင့်တပ်တော် (AA) ရို့ မြိုတွင်း တိုက်ပွဲဖြစ်ပွားခရေ”လို့ဆိုပါရေ။
စစ်ကောင်စီစွာ ပေါက်တောမြို့က ရဟန်းသံဃာ အပါအဝင် ဒေသခံပြည်သူလူထု ၁၀၀ နီးပါးကို ဓါးစာခံနန့် လူသားဒိုင်းကာအဖြစ်အသုံးပြုဖို့ နိုဗမ်ဘာ ၁၆ ရက်နိက စလို့ ပြန်ပီးဆွဲထားစွာရေ (၆)ရက်အထိဟိ လာရေလို့လည်း ထုတ်ပြန်ချက်မာ ဖော်ပြပါရေ။
ယင်းကြောင့် ရက္ခိုင့်တပ်တော်စွာ ပေါက်တောမြို့အတွင်းက စစ်ကောင်စီတပ်ဖွဲ့ဝင်တိဟိရာ နီရာတိကို ဝင်ရောက်တိုက်ခိုက်ခပြီးကေ ဓါးစာခံပြည်သူလူထုအားလုံးကို ဖီးအန္တရာယ်ကင်းစွာနန့် ကယ်ထုတ်နိုင်ဖို့ ကြိုးစားစွာမာ စစ်ကောင်စီတပ်နန့် တိုက်ပွဲ ဖြစ်ပွားခစွာလို့ သိရပါရေ။
ယင်းအပြင် ဓါးစာခံပြည်သူလူထုတိကို ကယ်တင်နိုင်ခရေ ဒေဂုတိုက်ပွဲစွာ ပေါက်တောမြို့အတွင်း ပြင်းထန်ခပြီးကေ စစ်ကောင်စီတပ်က အထိနာပနာ အကျအဆုံးများခကြောင်း၊ လက်နက်ခဲယမ်းတချို့ကို သိမ်းဆည်းရမိခကြောင်းနန့် AA ဖက်ကလည်း အာရက္ခစစ်သည်တော်တချို့ အသက်ပီးဆပ်ခရပြီးကေ ဒဏ်ရာရဟိသူတချို့ဟိခရေလို့ ဆိုပါရေ။
ယင်းကြောင့် ရန်သူစွာ လီကြောင်း၊ ရီကြောင်းကနီ လက်နက်ကြီးတိ၊ အတွဲလိုက်ဒုံးတိနန့် တိုက်ပွဲဖြစ်ပွားရာ နီရာတိသို့တင်မက တိုက်ပွဲဖြစ်ပွားခြင်းမဟိရေနီရာတိသို့ပါ ဒေဂုအချိန်ထိ ယမ်းသန်းပစ်ခတ်တိုက်ခိုက်နီရေလို့ သိရပါရေ။
ရက္ခိုင့်တပ်တော်စွာ ရက္ခိုင်ပြည်သူလူထု၏ အသက်၊ အိုးအိမ်၊ စည်းစိမ်ရို့ကို အမြဲတမ်းကာကွယ်ပီးလျက်ဟိပြီး ပြည်သူလူထုကိုဒုက္ခရောက်အောင်လုပ်တေ ဇာသူ့ကိုမဆို တားဆီးတိုက်ဖျက်လားဖို့နန့် အာရက္ခပြည်သူလူထုကိုသတ်ဖြတ်နီရေ စစ်ကောင်စီတပ်ဖွဲ့ဝင်တိကိုလည်း ထုတ်ပြန်ထားရေအတိုင်း လက်စားချေ တုံ့ပြန်လားဖို့ လို့ဆိုပါရေ။
ယင်းအပြင် ပေါက်တောမြို့အတွင်း ကျန်ဟိနီသိမ့်ရေ စစ်ကောင်စီတပ်ဖွဲ့ဝင်တိကို ဆက်လက်ချေမှုန်းနီပြီး ကျန်ဟိနီသိမ့်ရေ ဓါးစာခံတိ အန္တရာယ်ကင်းစွာ လွတ်မြောက်နိုင်ရီးအတွက်လည်း ဆက်လက် ကြိုးပမ်းဆောင်ရွက်လျက်ဟိကြောင်း ရက္ခိုင့်တပ်တော် AA ၏ထုတ်ပြန်ချက်မာ ဖော်ပြထားပါရေ။
https://www.facebook.com/arakanprincessmedia1/posts/368273472264280