By Arakan Princess Media / 2023 October 22
ဘူးသီးတောင်မြို့နယ်၊ စေတီတောင်စစ်ဖီးယှောင်စခန်းမာ လက်ဟိ စားဝတ်နီရီး ဆိုးဆိုးဝါးဝါး အခက်ကြုံနီကတ်ရကြောင်းသိရပါရေ။
စေတီတောင်စစ်ဖီးယှောင်စခန်းမာ အိမ်ထောင်စု ၁၇၂ စုနန့် လူဦးရေ ၈၂၁ ယောက် ဟိပါရေ။
ယင်းစခန်းကစစ်ဖီးယှောင်အများစုစွာ နိစားအလုပ်ကိုရာ လုပ်ကိုင်နီကတ်ရစွာဖြစ်ပြီးကေ ဒေဂုခါ အလုပ်အကိုင်ယှားပါးလာရေအပြင် ကူညီထောက်ပံ့မှုလည်း မဟိသလောက်နည်းပါးလာလို့ စစ်ဖီးယှောင်အားလုံးနီးပါ စားဝတ်နီရီးကို အကြီးအကျယ် အခက်ကြုံနီကတ်ရရေလို့ စစ်ဖီးယှောင်တိက ပြောပါရေ။
ယင်းကြားထဲ မုန်တိုင်းတိုက်ပြီးနောက်ပိုင်းကစလို့ ကုန်ဈီးနှုန်းတိလည်း အဆမတန်မြင့်တက်နီ ရေအတွက် လူဦးရေများရေ မိသားစုတိမာ စားနပ်ရိက္ခာတိပြတ်ပနာ ထမင်းနပ်မမှန်လောက်အောင်ထိ ဆိုးဝါးလာရေလို့ ဆိုပါရေ။
စေတီတောင်စစ်ဖီးယှောင်စခန်းအပါ ရက္ခိုင်ပြည်မြို့နယ်တိဟိ စစ်ဖီးယှောင်စခန်းအများစုမာလည်း ကူညီထောက်ပံ့မှု နည်းပါးခြင်း၊ ကုန်ဈီးနှုန်းမြင့်တက်ခြင်းရို့ကြောင့် စစ်ဖီးယှောင်တိစွာ ထမင်းနပ်မှန်အောင် မနည်းကြိုးစားနီကတ်ရရေလို့ သိရပါရေ။
ရက္ခိုင်ပြည်မာ စစ်ဖီးယှောင်စခန်း တရာကျော်နန့် စစ်ဖီးယှောင်ဦးရေ ၇ သောင်းကျော်ကျန်နီသိမ့်ပြီးကေ အများစုမာ ၂၀၁၈ /၂၀၁၉ ခုနှစ် တိုက်ပွဲကာလကပင် အိုးအိမ်စွန့်ခွာ တိမ်းယှောင်လာကတ်ရလူတိဖြစ်ပါရေ။
https://www.facebook.com/arakanprincessmedia1/posts/352635323828095