ပါတီခေါင်းဆောင်နှစ်ဦးလွတ်မြောက်ရေး ကြိုးပမ်းနေကြောင်း ဒေါက်တာအေးမောင်ပြော

By DMG / 2023 September        7

ပုံစာ – ဖမ်းဆီးခံထားရသော AFP ပါတီခေါင်းဆောင် ဦးကျော်ဇောဦး(ဝဲ) နှင့် ဦးကျော်လွင်(ယာ)။ ဓာတ်ပုံ – AFP

ရက္ခိုင့်တပ်တော်(AA)က ဖမ်းဆီးထားသည့် ပါတီထိပ်ပိုင်းခေါင်းဆောင်နှစ်ဦး လွတ်မြောက်ရေးအတွက် ကြိုးပမ်းနေကြောင်း ရခိုင့်ဦးဆောင်ပါတီ (AFP) ဥက္ကဌ ဒေါက်တာအေးမောင်က DMG သို့ ပြောသည်။

AFP ပါတီ ဒု-ဥက္ကဌ ဦးကျော်ဇောဦးနှင့် အကြံပေး ဦးကျော်လွင်တို့အား ပြန်လွှတ်ပေးရေးအတွက် လာမည့် စက်တင်ဘာ ၉ ရက် ဆရာတော် ဦးဥတ္တမနေ့တွင် Statement ထုတ်ပြန်တောင်းဆိုသွားမည်ဟု ပါတီဥက္ကဌက ပြောသည်။  

“မြန်မာနိုင်ငံရေးအခင်းအကျင်းမှာပဲဖြစ်ဖြစ်၊ ရခိုင်နိုင်ငံရေးအခင်းအကျင်းမှာပဲဖြစ်ဖြစ် နိုင်ငံရေးပါတီတွေရဲ့ ကဏ္ဍဟာ လိုအပ်ဆဲဖြစ်တဲ့အတွက် ဥာဏ်ရည်မြင့်မားတဲ့ နိုင်ငံရေးပါတီတွေနဲ့အတူဆောင်ရွက်ဖို့ နိုင်ငံရေးခေါင်းဆောင်တွေ လိုအပ်တယ်။ ဒါတွေကိုလည်း ULA/AA ဖက်က သဘောပေါက်စေချင်တယ်” ဟု ဒေါက်တာအေးမောင်က ပြောသည်။ 

ရက္ခိုင့်တပ်တော်(AA)က ဦးကျော်လွင်ကို ၂၀၂၂ ခုနှစ် အောက်တိုဘာလ ၄ ရက်နေ့တွင် ဖမ်းဆီးခဲ့ပြီး၊ ဦးကျော်ဇောဦးကို ၂၀၂၂ ခုနှစ် နိုဝင်ဘာလ ၂ ရက်နေ့တွင် ဖမ်းဆီးခဲ့ခြင်းဖြစ်သည်။

၎င်းတို့နှစ်ဦးသည် စစ်ရေးကာလတွင် ပြည်သူများ စိတ်ဝမ်းကွဲပြားပြီး ဇဝေဇဝါဖြစ်အောင် ရေးသားမှုများရှိခဲ့၍ ခေါ်ယူမေးမြန်းခြင်းဖြစ်ကြောင်း ရက္ခိုင့်တပ်တော် ပြောရေးဆိုခွင့်ရှိသူ ဦးခိုင်သုခက ၂၀၂၂ ခုနှစ်၊ နိုဝင်ဘာလ ၂၈ ရက်နေ့ သတင်းစာရှင်းလင်းပွဲတွင် ပြောဆိုခဲ့သည်။ 

ဦးကျော်ဇောဦးမှာ ယနေ့အချိန်ထိ မိသားစုဝင်များနှင့် အဆက်အသွယ်မရရှိသေးဘဲ ဦးကျော်လွင်မှာ မိသားစုနှင့် ဖုန်းအဆက်အသွယ်ရှိကြောင်း သိရသည်။

ဦးကျော်လွင်၏သမီး မနှင်းဝေဝေက “ဖုန်းအဆက်သွယ်ကလည်း အဖေဆက်လာမှ ပြောရတာ။ လူချင်းတွေ့ရတာတော့ မရှိဘူး။ မိသားစုဝင်တွေကတော့ အမြန်ဆုံး ပြန်လွှတ်ပေးစေချင်တယ်” ဟု ပြောသည်။ 

ဦးကျော်ဇောဦး၏ဖခင် အမျိုးသားလွှတ်တော်အမတ်ဟောင်း ဦးဝေစိန်အောင်က “သားနဲ့က အဆက်သွယ် လုံးဝမရှိဘူး။ ဖုန်းလည်းတစ်ခါမှမဆက်ဘူး။ သူ့အခြေအနေကလည်း သွားကတည်းက မသိလိုက်ဘူး၊ ခိုင်သုခတို့ ပြောမှပဲသိတယ်။ သူ့ကို ဖမ်းထားတဲ့ပုံစံလား၊ ဘယ်လိုပုံစံလဲ မသိဘူး၊ အေးအေးချမ်းချမ်းလို့တော့ ကြားတယ်။ ခိုင်သုခတို့ပြောတဲ့ဟာမှာလည်း ဆွေးနွေးစရာရှိလို့ ခေါ်ထားတယ်လို့ ပြောတယ်။ ထိန်းသိမ်းထားတယ်လို့မပါဘူး။ ထိန်းသိမ်းထားတယ်ဆိုရင်တော့ ပြန်လွှတ်ပေးရမှာဖြစ်တယ်” ဟု ပြောသည်။

ရခိုင့်ဦးဆောင်ပါတီသည် ပါတီခေါင်းဆောင်နှစ်ဦး လွတ်မြောက်ရေးအတွက် တရုတ်ကွန်မြူနစ်ပါတီ(CPC) ပါတီနှင့် ဂျပန်အစိုးရ၏ မြန်မာနိုင်ငံအမျိုးသားပြန်လည်သင့်မြတ်ရေးဆိုင်ရာ အထူးကိုယ်စားလှယ် မစ္စတာ ဆာဆာကာဝါထံ ပြီးခဲ့သည့် ၂၀၂၂ ခုနှစ် ဒီဇင်ဘာလအတွင်းက တောင်းဆိုမှုများ ပြုလုပ်ခဲ့သေးသည်။ 

#I006 #DMG

https://www.facebook.com/dmgnewsagency/posts/693616829478583

Leave a Reply

Your email address will not be published.