By Arakan Princess Media / 2023 August 18
ရီကြီးမှုဒဏ်ခံကို ဆိုးဆိုးဝါးဝါးခံခရသည့်မြောက်ဦးမြို့၊ မြတန်ဆောင်းစစ်ဖီးယှောင်စခန်းတွင် လက်ဟိ ဆောက်လုပ်ရီးပစ္စည်းများအပါအဝင် အရေးပေါ်အကူအညီများ အပူတပြင်း လိုအပ်လျက်ဟိကြောင်း သိရသည်။
မြတန်ဆောင်းစစ်ဖီးယှောင်စခန်းတွင် အိမ်ထောင်စု ၂၇၈ စုနန့် လူဦးရေ ၁၁၇၅ ယောက် ခိုလှုံနီထိုင်လျက်ဟိပြီး၊ ရီကြီးမှုအတွင်းက စခန်းတခုလုံးရီနစ်မြုပ်ခရသည့်အပြင် လူနီအဆောင် ၃၂ ဆောင်လေ့ ပျက်စီးခရသည်။
ယင်းအပြင် တခြားနီအိမ်အများအပြားလေ့ တိုင်များ ယိုင်လားခြင်း၊ အမိုးအကာများပျက်စီးကာ ရီထဲမျောပါလားခြင်းစသည့် အဖက်ဖက်က ပျက်စီးခရကြောင်း စစ်ဖီးယှောင်များက ပြောသည်။
လက်ဟိ ယင်းအဆောင်များကို ဖြစ်တေပိုင် ပြုပျင်နီကတ်ရပြီး သစ်၊ ဝါးအပါအဝင် ဆောက်လုပ်ရီးသုံးပစ္စည်းများအပူတပြင်း လိုအပ်နီသည် ဟုဆိုသည်။
အကူအညီလာရောက်ထောက်ပံ့မှု နည်းပါးခြင်းကြောင့်လေ့ စစ်ဖီးယှောင်များ ပို၍ အခက်ကြုံနီကတ်ရပြီး စားနပ်ရိက္ခာများလေ့ ပြတ်လပ်လျက်ဟိသည်။
အလားတူ ရီကြီးမှုနောက်ပိုင်း စခန်းပတ်ဝန်းကျင် ညစ်ညမ်းခြင်း၊ သောက်သုံးရီမသန့်ယှင်းခြင်းများကြောင့် ခြင်ပေါက်ပွားမှုများပြားလာကာ စခန်းတွင်း နီမကောင်းဖြစ်ပွားလူ များပြားလာနီပြီး ခြင်ထောင်အပါအဝင် အခြီခံ လူအသုံးအဆောင်ပစ္စည်းများနန့် ဆီးဝါးအကူအညီများလေ့ အရေတကြီးလိုအပ်လျက်ဟိကြောင်းသိရသည်။
မေ ၁၄ ရက်နိက တိုက်ခတ်ခသည့် Mocha ဆိုင်ကလုန်းမုန်တိုင်းကြောင့် မြတန်ဆောင်း စစ်ဖီးယှောင်စခန်းအပါအဝင် ရက္ခိုင်ဟိစစ်ဖီးယှောင်စခန်းအများစု ထိခိုက်နစ်နာခရပြီး၊ တချို့စခန်းများမှာ လက်ဟိအချိန်ထိ အမိုးအကာအောက်သို့ရောက်ရန် ခက်ခဲနီတုန်းဖြစ်ကာ နောက်ထပ်ရီကြီးမှုဒဏ်ကို ထပ်ကြုံခရသည်အတွက်လေ့ ပြန်လည်ထူထောင်ရီး ပို၍ အခက်ကြုံနီကတ်ရကြောင်း သိရသည်။
https://www.facebook.com/arakanprincessmedia1/posts/318475887244039