လူထုဇော်ဝင်းအပါအဝင် ကျောက်တော်က ၃ ယောက်အမှု ရုံးချိန်းထပ်ရွှိ

By Arakan Princess Media / 2023 July    10

မြန်မာပြည်ဆူပူအောင်လှုံံ့ဆော်မှုဆိုင်ရာ ဥပဒေပုဒ်မ ၅၀၅(က)ဖြင့် တရားစွဲခံထားရသည့် ကျောက်တော်မှ လူထု ဇော်ဝင်း အပါအဝင် ဒေသခံ ၃ ယောက်အမှုကို ဒေနိ(ဂျူလိုင် ၁၀ ရက်နိ)၌ ကျောက်တော်မြို့နယ် တရားရုံးတွင် ရုံးထုတ်ခကေလေ့ လိုပြသက်သီမရောက်၍ မစစ်ဆီးနိုင်ခဘဲ လာမည့် ဂျူလိုင် ၂၄ ရက်နိသို့ ရုံးချိန်းထပ်ရွှိလိုက်ကြောင်းသိရသည်။

ပုဒ်မ ၅၀၅(က)ဖြင့် တရားစွဲခံထားရသူများမှာ ကျောက်တော်မြို့၊ ပြည်တော်သာရပ်ကွက်မှ ဦးဇော်ဝင်း(ခေါ်) လူထုဇော်ဝင်း၊ ကျောက်တော်မြို့နယ် ခေါင်းတုတ်ရွာမှ ဦးကျော်သန်းမောင်နန့် ပန်းဖဲချောင်းရွာမှ ကိုဇော်မိုးထက်ရို့ ဖြစ်ကတ်သည်။

အမှုကို ဒေနိတွင် ကျောက်တော်မြို့နယ်၊တရားရုံး၌ ရုံးထုတ်ခကေလေ့၊ လိုပြသက်သီမရောက်ဟုဆိုကာ မစစ်ခဘဲ လာမည့် ဂျူလိုင်၂၄ ရက်နိသို့ ရုံးချိန်းထပ်ရွှိလိုက်သည်။

ကုန်ခသည့် ၂၀၂၂ ခုနှစ်၊ ဂျုန်လ၌မြန်မာစစ်တပ် တပ်ဖွဲ့ဝင်များက ဦးဇော်ဝင်း၊ ဦးကျော်သန်းမောင်နန့် ကိုဇော်မိုးထက်ရို့ကို အကြောင်းအမျိုးမျိုးပြ၍ ဖမ်းဆီးခသည်။

ယင်းနောက် ရက္ခိုင့်တပ်တော် AA နန့်ဆက်စပ်သည်ဟု စွပ်စွဲကာ ပုဒ်မ ၅၀၅ (က) ဖြင့် တရားစွဲဆိုထားခြင်းဖြစ်သည်။

လက်ဟိတွင် ၎င်းရို့ ၃ ယောက်ကို ကျောက်တော်မြို့မရဲစခန်း၌ ထိန်းသိမ်းချုပ်နှောင်ထားကြောင်း သိရသည်။

https://www.facebook.com/photo/?fbid=298681862556775&set=a.188138466944449

Leave a Reply

Your email address will not be published.