ရခိုင်က ကိုယ်ဝန်ဆောင်နှင့် ၂ နှစ်အောက်ကလေးများ ထောက်ပံ့ကြေးမရဘဲ နှစ်ချီကြာမြင့်လာ

By DMG / 2023 July       31

ရခိုင်ပြည်က မြို့နယ်အချို့တွင် လူမှုဝန်ထမ်းဦးစီးဌာနက လစဉ်ထောက်ပံ့သည့် ကိုယ်ဝန်ဆောင်နှင့် အသက် ၂ နှစ်အောက် ကလေးများ ထောက်ပံ့ငွေ မရသည်မှာ နှစ်ချီကြာလာနေပြီဖြစ်ကြောင်း သိရသည်။

“ကျမကိုယ်ဝန်စဆောင်ကတည်းကနေ အခုထိ မရသေးတာပါ။ အုပ်ချုပ်ရေးမှူးကနေတဆင့် စာရင်းတင်ထားပေမဲ့လည်း အခုထိမရသေးပါဘူး။ ဘာကြောင့်မရသေးလဲဆိုတာကို ကျမလည်း အတိအကျမသိဘူး” ဟု ကျောက်ဖြူမြို့ခံ ကလေးမိခင်တစ်ဦးက ပြောသည်။

ကိုယ်ဝန်ဆောင်မိခင်နှင့် ၂ နှစ်အောက်ကလေးငယ်များ ကျန်းမာသန်စွမ်းပြီး အာဟာရပြည့်ဝစွာ စားသုံးနိုင်ရန်အတွက် ကိုယ်ဝန်ဆောင်မိခင်တစ်ဦးကို တစ်လလျှင် ငွေကျပ် ၃၀,၀၀၀၊ ၂ နှစ်အောက် ကလေးတစ်ဦးကို တစ်လလျှင် ငွေကျပ် ၁၅,၀၀၀ စီ ရခိုင်ပြည်နယ် လူမှုဝန်ထမ်းဦးစီးဌာနမှ လစဉ်ထောက်ပံ့နေခြင်း ဖြစ်သည်။

ထောက်ပံ့ငွေကို သုံးလတစ်ကြိမ် (သို့မဟုတ်) တစ်လတစ်ကြိမ်စီ ပြည်နယ်လူမှုဝန်ထမ်းဦးစီးဌာနက သက်ဆိုင်ရာမြို့နယ် ကျန်းမာရေးဌာနအလိုက် ထုတ်ပေးခြင်းဖြစ်သော်လည်း ၂၀၂၂ နှစ်လယ်ပိုင်းမှစပြီး မြောက်ဦး၊ ကျောက်ဖြူ၊ ကျောက်တော်၊ ပေါက်တော စသည့် မြို့နယ်တို့တွင် အဆိုပါအစီအစဉ်မှာ ရပ်ဆိုင်းနေကြောင်း DMG က စုံစမ်းသိရှိရသည်။

ကျောက်တော်မြို့၊ ညောင်ချောင်းစစ်ဘေးရှောင်စခန်းမှ ဒေါ်ထွေးထွေးက “ထောက်ပံ့ငွေတစ်ခု လစဉ်ပုံမှန်ရနေတော့ ဘယ်လိုပဲပြောပြော ကလေးအတွက် ထမင်းဗူး၊ အားဆေးတွေ ဖူဖူလုံလုံ ဝယ်တိုက်နိုင်တယ်။ မရရင်တော့လည်း မိဘတွေ အဆင်ပြေသလောက်ပဲ ဝယ်နိုင်ပါတယ်” ဟု ပြောသည်။

ထောက်ပံ့ငွေရရှိရေးအတွက် မြောက်ဦးမြို့နယ်က ဒေသခံများမှာ မြို့နယ်လူမှုဝန်ထမ်းဦးစီးဌာနထံ ၂၀၂၂  ဩဂုတ်လတွင် တစ်ကြိမ်နှင့် ၂၀၂၃ မတ်လတွင်တစ်ကြိမ် စာရင်းသွင်းထားသော်လည်း လက်ရှိအချိန်ထိ တစ်စုံတစ်ရာ အကြောင်းကြားလာခြင်း မရှိသေးကြောင်း ပြောကြသည်။

မြောက်ဦးမြို့နယ် ရွှေကျင်ပြင်ကျေးရွာ အုပ်ချုပ်ရေးမှူး ဦးကျော်တင်က “အရင်နှစ်ကတော့ ဟိုလပေးမယ်ပြောလိုက်၊ ဒီလပေးမယ်လို့ပြောလိုက်နဲ့ ရလည်းမရခဲ့ဘူး။ အခုနောက်ပိုင်းတော့ ဘာမှမကြားမိတော့ဘူး။ ကိုယ်ဝန်ဆောင်တွေ၊ ကလေးမိခင်တွေကတော့ လိုချင်ကြတာပေါ့။ မရတော့ဘူးဆိုရင်လည်း မရတဲ့အကြောင်းကိုပြောရင် ကျနော်တို့က ကျေနပ်တယ် ” ဟု ပြောသည်။

ယခုကိစ္စနှင့်ပတ်သက်ပြီး အသေးစိတ်သိနိုင်ရန် ရခိုင်ပြည်နယ် လူမှုဝန်ထမ်းဦးစီးဌာန ညွှန်ကြားရေးမှူး ဦးမြင့်ဇော်ကို DMG က ဖုန်းဖြင့် ဆက်သွယ်ခဲ့သော်လည်း ဖုန်းလက်ခံဖြေကြားခြင်း မရှိသေးပေ။

မြောက်ဦးမြို့နယ် ကျန်းမာရေးဦးစီးဌာနမှ ဝန်ထမ်းတစ်ဦးကို DMG က ဆက်သွယ်မေးမြန်းကြည့်ရာ “အတိကျတော့ မသိရသေးဘူး။ ဒါပေမဲ့ ဒီနှစ် စက်တင်ဘာ၊ အောက်တိုဘာလမှာ ပေးမယ်လို့တော့ ကြားပါတယ်။ အရင် မပေးခဲ့တဲ့လအတွက် အစားထိုးရ/မရကိုတော့ ကျမတို့လည်း မသိပါဘူး ” ဟု ပြောသည်။

ကိုယ်ဝန်ဆောင်မိခင်များနှင့် ၎င်းတို့မှမွေးဖွားသော အသက်(၂)နှစ်အောက် ကလေးသူငယ်များအား ငွေကြေးထောက်ပံ့ခြင်း အစီအစဉ် (Maternal and Child Cash Transfer – MCCT) ကို အာဟာရနှင့် ကျန်းမာရေးဆိုင်ရာ ဆင်းရဲမှုအခြေအနေ အညွှန်းကိန်းများမြင့်မားနေသော ဒေသများတွင် ၂၀၁၇ ခုနှစ်ကစပြီး ဆောင်ရွက်ခဲ့ခြင်းဖြစ်သည်။

MCCT အစီအစဉ်ကို လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာနက ချင်းပြည်နယ်တွင် ဦးစွာဆောင်ရွက်ခဲ့ပြီးနောက် နာဂကိုယ်ပိုင်အုပ်ချုပ်ခွင့်ရဒေသနှင့် ရခိုင်ဒေသတွင် ဦးစားပေးဆောင်ရွက်ခဲ့ခြင်းဖြစ်သည်။

https://www.facebook.com/dmgnewsagency/posts/673707841469482

Leave a Reply

Your email address will not be published.