By Narinjara / 2022 April 10
အေးမြတ်ခိုင်
ရက္ခိုင့်တပ်တော်(AA)၏နိုင်ငံရေးရည်မှန်းချက်များ ပြီးမြောက်အောင်မြင်ပါစေကြောင်းဆုတောင်းကာ AA တပ်မွေးနေ့အတွက် ဂုဏ်ပြုသဝဏ်လွှာကို အမျိုးသားညီညွတ်ရေးအစိုးရ (NUG)၏ယာယီသမ္မတ ဒူဝါလရှီးလက ယနေ့တွင် လက်မှတ်ရေးထိုးပေးပို့လိုက်သည်။
အဆိုပါသဝဏ်လွှာတွင် အမျိုးသားညီညွတ်ရေးအစိုးရအနေဖြင့် ယနေ့ ဧပြီလ ၁ဝ ရက်တွင်ကျရောက်သော ရက္ခိုင့်တပ်တော် (AA)၏ (၁၃)နှစ်ပြည့်အခမ်းအနား အောင်မြင်ပါစေကြောင်းနှင့် ရခိုင်လူမျိုးများနှင့်အတူ ရက္ခိုင့်တပ်တော်၏ နိုင်ငံရေးရည်မှန်းချက်များ ပြီးမြောက်အောင်မြင်ပါစေကြောင်း ဆုမွန်ကောင်းတောင်းထားသည်ကိုတွေ့ရသည်။
အမျိုးသားတန်းတူရေး၊ ကိုယ်ပိုင်ပြဋ္ဌာန်းခွင့်ရရှိရေး၊ ကိုယ့်ကြမ္မာကိုယ်ဖန်တီးနိုင်ခွင့်ရရှိရေးနှင့် စစ်အာဏာရှင်စနစ် ဖြုတ်ချနိုင်ရေးအတွက် ရခိုင်ပြည်သူလူထုကိုဦးဆောင်ပြီး တော်လှန်ရေးတိုက်ပွဲများ ဆင်နွှဲနိုင်ရန်အတွက် ထူထောင်ခဲ့သည့် ရက္ခိုင့်တပ်တော်(AA)၏ (၁၃)နှစ်ပြည့်အခမ်းအနားသို့ ပြည်ထောင်စုသမ္မတမြန်မာနိုင်ငံတော်၊ အမျိုးသားညီညွတ်ရေးအစိုးရကိုယ်စား ဂုဏ်ပြုအသိအမှတ်ပြုကြောင်းလည်း ယင်းသဝဏ်လွှာတွင် ရေးသားထားသည်။
အမျိုးသားညီညွတ်ရေးအစိုးရအနေဖြင့်လည်း အာဏာရှင်များ ခေတ်အဆက်ဆက်ကျင့်သုံးခဲ့သည့် လူမျိုးကြီးဝါဒနှင့် တပြည်ထောင်အုပ်ချုပ်ရေးစနစ်ကို အပြီးတိုင်ဖျက်သိမ်းပြီး တိုင်းရင်းသားလူမျိုးအားလုံး၏ တန်းတူညီမျှရေး၊ ကိုယ်ပိုင်ပြဋ္ဌာန်းခွင့်နှင့် ကိုယ့်ကြမ္မာကိုယ်ဖန်တီးပိုင်ခွင့်ကို အာမခံသည့်နိုင်ငံရေးစနစ်သစ် ဖန်တီးနိုင်ရေး ကြိုးပမ်းဆောင်ရွက်လျက်ရှိကြောင်း ရေးသားထားသည်။
ရက္ခိုင့်တပ်တော် (AA)ကို လူပေါင်း ၂၆ ဦးဖြင့် ကချင်ပြည်နယ်၊ KIA ထိန်းချုပ်နယ်မြေ လိုင်ဇာမြို့တွင် ၂၀၀၉ ခုနှစ်က တည်ထောင်ခဲ့ပြီး ယနေ့သည် AA ၏ ၁၃ နှစ်ပြည့်မြောက်သည့်နေ့ဖြစ်သည်။
https://www.facebook.com/narinjara.info/posts/5366781926667174