အမ်းမြို့နယ်တွင် ကုန်တင်ယာဉ်တစ်စီးတိမ်းမှောက်၊ နှစ်ဦးသေဆုံး

By Development Media Group (DMG)/ 2021 November 5

ရခိုင်ပြည််နယ်၊ အမ်းမြို့နယ် တောင်စောက်ကျေးရွာအနီးတွင် နိုဝင်ဘာလ ၅ ရက် နံနက်အစောပိုင်းက ကုန်တင်ယာဉ်တစ်စီး တိမ်းမှောက်မှုကြောင့် အမျိုးသားနှစ်ဦး သေဆုံးခဲ့သည်။

အဆိုပါကုန်တင်ယာဉ်မှာ မင်းဘူးမြို့မှ စစ်တွေမြို့သို့ မောင်းနှင်လာစဉ် မိုင်တိုင်အမှတ်(၇၂)ခန့်အရောက်တွင် မော်တော်ယာဉ်တစ်စီးက ကျော်တက်မောင်းနှင်သဖြင့် ကုန်တင်ယာဉ်မောင်းက ယင်းယာဉ်ကိုကျော်တက်မောင်းနှင်ရန် အပြိုင်အဆိုင်မောင်းနှင်ခဲ့ရာမှ ယာဉ်တိမ်းမှောက်ခဲ့ခြင်းဖြစ်သည်ဟု သွားရောပ်ကူညီခဲ့သည့် စွမ်းပရဟိတလူငယ်များအသင်း ဥက္ကဋ္ဌ ကိုဇော်ဝင်းထွန်းက ပြောသည်။

“ကုန်တင်ကားကို ကားလေးတစ်စီးက ဟိုဘက်တောင်ကြောမှာ ကျော်တက်လိုက်တယ်။ ကုန်တင်ကားမောင်းသူက သူ့ကားကိုကျော်တက်သွားလို့ အဲ့ဒီကားလေးကိုမှီအောင် ပြန်လိုက်မောင်းတယ်။ အဲဒီမှာ အရှိန်မထိန်းနိုင်ဖြစ်ပြီးကားမှောက်တယ်။ ကားမှောက်တဲ့နေရာက ‘ဂ’ကွေ့နေရာဖြစ်တယ်”ဟု ကိုဇော်ဝင်းထွန်းကဆိုသည်။

ထိုသို့တိမ်းမှောက်ခဲ့သည့်ကုန်တင်ယာဉ်မှာ ပေ ၂၀၀ ခန့်ရှိအမြင့်ပေါ်မှ ပြုတ်ကျခဲ့သောကြောင့် ယာဉ်ပေါ်ပါလာသည့် အမျိုးသားနှစ်ဦးမှာ သေဆုံးသွားခဲ့သည်။

တိမ်းမှောက်ခဲ့သည့် ယာဉ်ပေါ်မှကုန်ပစ္စည်းများမှာ လမ်းပေါ်ပြန့်ကျဲခဲ့သောကြောင့် မင်းဘူး-အမ်းကားလမ်းမှာ ယနေ့နံနက်ပိုင်းက အချိန်သုံးနာရီကျော်ကြာ ယာဉ်ကြောပိတ်ဆို့မှုဖြစ်ပွားခဲ့သည်။

“ရခိုင်ရိုးမက မြန်မာနိုင်ငံရဲ့အခြားတောင်ပေါ်လမ်းတွေနဲ့ ယှဉ်လိုက်ရင် အန္တရာယ်အများဆုံးအခြေအနေမှာရှိနေတယ်။ အကွေ့အကောက်တွေကလည်းများတယ်။ ဒီတော့ ဒီလမ်းလောက်ကတော့ ငါပိုင်ပါတယ်ကွာဆိုပြီး ပေါ့ပေါ့ဆဆနဲ့တော့ မမောင်းစေချင်ဘူး”ဟု အမ်းမြို့နယ် ဒေသခံတစ်ဦးကပြောသည်။

ယခုကုန်တင်ယာဉ်တိမ်းမှောက်သည့်နေရာမှာ အလွန်အန္တရာယ်များသည့်နေရာဖြစ်ကြောင်း၊ ပြီးခဲ့သည့်သုံးနှစ်ခန့်က ဆီဘောက်ဆာယာဉ်တစ်စီးထိုးကျခဲ့ပြီး လွန်ခဲ့သည့်ဆယ်နှစ်ခန့်ကလည်း ဓာတ်ငွေ့ပိုက်လိုင်းတင်လာသည့်ယာဉ်တစ်စီး တိမ်းမှောက်ခဲ့ကြောင်း အဆိုပါဒေသခံကပြောသည်။

ရခိုင်ရိုးမကိုဖြတ်သန်းရသည့် မင်းဘူး-စစ်တွေကားလမ်းမှာ လမ်းမကောင်းသည့်အပြင် မိုးရာသီကာလတွင် တောင်ကျရေကြောင့် မြေပြိုကျမှုများရှိကြောင်း၊ ယာဉ်မောင်းအချို့ကလည်း ယာဉ်မဆင်မခြင်မောင်းနှင်မှုကြောင့် ယာဉ်တိုက်မှု၊ ယာဉ်တိမ်းမှောက်မှုများရှိကြောင်း သိရသည်။

https://www.facebook.com/dmgnewsagency/posts/2149692218516511

Leave a Reply

Your email address will not be published.