ဝန်ကြီးချုပ်ဟောင်း ဦးညီပု၏အယူခံကို ခရိုင်တရားရုံးက ပယ်ချ

By Development Media Group (DMG)/ 2021 November 22

အလုပ်ကြမ်းနှင့် ထောင်ဒဏ်(၂)နှစ်ချမှတ်ခံထားရသည့် ရခိုင်ပြည်နယ်ဝန်ကြီးချုပ်ဟောင်း ဦးညီပု၏ အယူခံကို ယနေ့(နိုဝင်ဘာ ၂၂ ရက်)တွင် စစ်တွေခရိုင်တရားရုံးမှ ပယ်ချက်လိုက်ကြောင်း ရှေ့နေထံမှ သိရသည်။

“၁၀ လပိုင်း ၈ ရက်နေ့က ၅၀၅(ခ)အရ အမိန့်ချမှတ်လိုက်တာကို ဒီနေ့စစ်တွေခရိုင်တရားရုံးမှာ အယူခံတက်တာ။ အယူခံမှုအမှတ် ၃ အရအယူခံတက်တယ်ပေါ့။ အယူခံတက်တာကို ကြားနာပြီး ပလပ်လိုက်တာ”ဟု သဇင်ဥပဒေဆိုင်ရာအဖွဲ့အစည်းမှ အထက်တန်းရှေ့နေ ဦးအောင်မြတ်ကျော်က ပြောသည်။

နိုင်ငံတော်အာဏာကို စစ်တပ်ကသိမ်းယူခဲ့သည့် ဖေဖော်ဝါရီလ ၁ ရက်နေ့တွင် ရခိုင်ပြည်နယ်ဝန်ကြီးချုပ်ဦးညီပုကို ဖမ်းဆီးထိန်းသိမ်းခဲ့ပြီး ၂ ရက်အကြာတွင်ပြန်လွှတ်ပေးကာ နေအိမ်အကျယ်ချုပ်ဖြင့် ထားရှိခဲ့သည်။

ဖေဖေါ်ဝါရီလ ၉ ရက်နေ့တွင် ပြည်သူသို့ပြန်ကြားချက်ဗွီဒီယိုဖိုင်တစ်ခုကို လူမှုကွန်ယက်စာမျက်နှာမှတစ်ဆင့်ဖော်ပြခဲ့သဖြင့် ဖေဖော်ဝါရီလ ၁၀ ရက်နေ့ ည ၁၀ နာရီကျော်အချိန်တွင် စစ်တပ်မှ ဦးညီပုကို ထပ်မံဖမ်းဆီးခဲ့သည်။

ယင်းနောက် စစ်တွေမြို့နယ် ဒုတိယမြို့နယ်အုပ်ချုပ်ရေးမှူး ဦးကျော်သိန်းကတရားလိုပြုလုပ်ကာ နိုင်ငံတော်အကြည်ညိုပျက်စေမှုပုဒ်မ-၅၀၅(ခ)ဖြင့် ဦးညီပုကို ဖေဖော်ဝါရီလ ၂၂ ရက်နေ့တွင် စစ်တွေမြို့နယ်တရားရုံး၌ တရားစွဲဆိုခဲ့သည်။

ဦးညီပုအား အောက်တိုဘာလ ၈ ရက်နေ့တွင် စစ်တွေမြို့နယ်တရားရုံးမှ အလုပ်ကြမ်းနှင့် ထောင်ဒဏ်(၂)နှစ်ချမှတ်ခဲ့သဖြင့် စစ်တွေခရိုင်တရားတရားရုံးသို့ အယူခံတက်ရောက်ခဲ့ရာ ပယ်ချခံခဲ့ရခြင်းဖြစ်သည်။

အဆိုပါအမှုကို ပြည်နယ်တရားလွှတ်တော်အထိ ဆက်လက်အယူခံတက်ရောက်သွားမည်ဖြစ်ကြောင်း ရှေ့နေထံမှသိရသည်။

ရခိုင်ပြည်နယ်ဝန်ကြီးချုပ်ဟောင်း ဦးညီပုမှာ အဂတိလိုက်စားမှုတိုက်ဖျက်ရေးဥပဒေပုဒ်မ- ၃ ခုနှင့်လည်း လက်ရှိတွင် တရားရင်ဆိုင်နေရသည်။

ယင်းအဂတိအမှုတွင် စီမံ/ဘဏ္ဏာဝန်ကြီးဟောင်း ဦးကျော်အေးသိန်း၊ လျှပ်စစ်၊စက်မှုနှင့် လမ်းပန်းဆက်သွယ်ရေးဝန်ကြီးဟောင်း ဦးအောင်ကျော်ဇံ၊ စိုက်ပျိုးရေး၊မွေးမြူရေး၊ သစ်တောနှင့်သတ္တုတွင်းဝန်ကြီးဟောင်း ဦးကျော်လွင်၊ စည်ပင်သာယာရေးဝန်ကြီးဟောင်း ဦးမင်းအောင်တို့လည်း ပါဝင်သည်။

https://www.facebook.com/dmgnewsagency/posts/2163065897179143

Leave a Reply

Your email address will not be published.