မြန်မာ့အရေးပြေလည်ဖို့ NLD ခေါင်းဆောင်တွေအပါအဝင် သက်ဆိုင်သူအားလုံးနှင့် တွေ့ဆုံသွားမည် (ဆာဆာကာဝါ)

By VOA/ 2021 November 15

မြန်မာနိုင်ငံမှာ လက်ရှိဖြစ်နေတဲ့ နိုင်ငံရေးပြဿနာတွေ ဖြေရှင်းနိုင်ဖို့ NLD ခေါင်းဆောင်တွေအပါအဝင် ကဏ္ဍအသီးအသီးက ခေါင်းဆောင်တွေနဲ့ သူ့ခရီးစဉ်အတွင်း တေ့ွဆုံဆွေးနွေးသွားမယ်လို့ မြန်မာနိုင်ငံအမျိုးသားပြန်လည်သင့်မြတ်ရေးဆိုင်ရာ ဂျပန်အစိုးရရဲ့အထူးကိုယ်စားလှယ်လည်းဖြစ်၊နီပွန်ဖောင်ဒေးရှင်းဥက္ကဋ္ဌလည်းဖြစ်တဲ့ Mr. Yohei Sasakawa ကပြောကြားလိုက်ပါတယ်။ ရခိုင်ပြည်နယ်ကို ဒီနေ့ သွားရောက်စဉ်မှာ ခုလို ပြောကြားခဲ့တာဖြစ်ပါတယ်။ ဒီအကြောင်းအပြည့်အစုံ ရန်ကုန်ကလာတဲ့သတင်းကို ဦးတင်မောင်သန်းကတင်ပြပေးထားပါတယ်။

မြန်မာနိုင်ငံကို နိုဝင်ဘာ ၁၂ ရက်နေ့ထဲက ရောက်ရှိနေတဲ့ မြန်မာနိုင်ငံအမျိုးသားပြန်လည်သင့်မြတ်ရေးဆိုင်ရာ ဂျပန်အစိုးရရဲ့အထူးကိုယ်စားလှယ် Mr. Yohei Sasakawa ဟာ ဒီနေ့ ရခိုင်ပြည်နယ်ကို သွားရောက် ခဲ့ပါတယ်။ စစ်တွေမြို့နယ်ထဲက အလိုတော်ပြည့်ကျောင်းမှာရှိတဲ့ ရခိုင်စစ်ဘေးဒုက္ခသည်စခန်းနဲ့ သက်ကယ်ပြင် မွတ်ဆလင်ဒုက္ခသည်စခန်းတို့ဆီကို သွားရောက်ခဲ့ပါတယ်။ ရခိုင်ပြည်နယ် ဒုက္ခသည်တွေအတွက် အမေရိကန်ဒေါ်လာ ၈.၅ သန်း လှူဒါန်းမယ်လို့ နီပွန်ဖောင်ဒေးရှင်းရဲ့ ဥက္ကဋ္ဌလည်းဖြစ်တဲ့ Mr. Sasakawa ကပြောကြားခဲ့ပါတယ်။

လက်ရှိမြန်မာနိုင်ငံရဲ့ နိုင်ငံရေးပြဿနာတွေ ဖြေရှင်းနိုင်ဖို့အတွက်လည်း NLD ရဲ့ ထိပ်ပိုင်းခေါင်း ဆောင်တွေအပါအဝင် ကဏ္ဍအသီးသီးက ခေါင်းဆောင်တွေနဲ့ သူ့မြန်မာနိုင်ငံခရီးစဉ်အတွင်းမှာ တွေ့ဆုံ ဆွေးနွေးသွားမယ်လို့ ရခိုင်ပြည်နယ် အစိုးရဧည့်ရိပ်သားမှာ ပြုလုပ်တဲ့ သတင်းစာရှင်းလင်းပွဲမှာ Mr. Sasakawa က ခုလို ပြောဆိုခဲ့ပါတယ်။

“မြန်မာနိုင်ငံရဲ့ လက်ရှိအခြေအနေဟာ ရှုပ်ထွေးတဲ့အခြေအနေမှာ ရှိနေတယ်လို့ ကျနော်သိရပါတယ်။ အဲဒါကြောင့် အခန်းကဏ္ဍအသီးသီးရဲ့ခေါင်းဆောင်ပိုင်းတွေနဲ့ တွေ့ပြီးတော့မှ ဘယ်လိုဆောင်ရွက်သွားရင် ဒီအခက်အခဲက ကျော်ဖြတ်သွားနိုင်မလဲ ဆိုတာကိုလည်း ကျနော့်လေ့လာသွားချင်ပါတယ်။ ကျနော်က အခုဆိုရင် မြန်မာနိုင်ငံအမျိုးသားပြန်လည်သင့်မြတ်ရေး အထူးကိုယ်စားလှယ် ဖြစ်တဲ့အတွက်ကြောင့် ဒီခရီးစဉ်မှာ NLD ရဲ့ ထိပ်ပိုင်းခေါင်းဆောင်တွေ၊ ရှစ်လေးလုံး အရေးတော်ပုံမှာ ပါဝင်ခဲ့တဲ့ ခေါင်းဆောင်တွေနဲ့ တွေ့ပြီး၊ သူတို့ဆီတွေက ကြားသိရတဲ့ စကားတွေကို နားထောင်ပြီး အဲဒီအပေါ်မှာ ခွဲခြမ်းစိတ်ဖြာပြီးမှ ဘယ်ပုံစံနဲ့ ဆောင်ရွက်သွားမလဲ ဆိုတာကို ကျနော်ကြိုးစားဆောင်ရွက်သွားမှာ ဖြစ်ပါတယ်။”

ဒေါ်အောင်ဆန်းစုကြည်အပါအဝင် NLD ထိပ်ပိုင်းခေါင်းဆောင်တွေ ဖမ်းဆီးခံထားရချိန် သူ့အနေနဲ့ ဘယ်သူတွေနဲ့ တွေ့ဆုံမယ်ဆိုတာကိုတော့ ရှင်းရှင်းပြောကြားခဲ့ခြင်း မရှိပါဘူး။ နိုဝင်ဘာ ၁၃ ရက်နေ့ ကတော့ သူဟာ စစ်ကောင်စီအကြီးအကဲ ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံ ဆွေးနွေးခဲ့ပါတယ်။ မြန်မာနိုင်ငံအမျိုးသားပြန်လည်သင့်မြတ်ရေးဆိုင်ရာ ဂျပန်အစိုးရရဲ့အထူးကိုယ်စားလှယ်ဟာ ရခိုင်လက်နက်ကိုင် AA နဲ့စစ်တပ်ကြား အပစ်အခတ်ရပ်စဲရေး ရရှိအောင် ကြားဝင် စေ့စပ်ညှိနှိုင်းဆောင်ရွက်ပေးခဲ့သူတယောက်ဖြစ်ပါတယ်။ အပစ်အခတ်ရပ်စဲရေး ၁ နှစ်ပြည့်အချိန် အခြေအနေကို လာရောက်လေ့လာတာဖြစ်တယ်လို့လည်း သူကပြောပါတယ်။ငြိမ်ချမ်းနေတဲ့ ရခိုင်ပြည်နယ်မှာ တိုက်ပွဲတွေ ထပ်မဖြစ်ဖို့ အောက်ခြေ အဆင့် တပ်သားတွေအထိ ညွန်ကြားထားဖို့ ရခိုင်လက်နက်ကိုင်အဖွဲ့ခေါင်းဆောင်တွေကို တိုက်တွန်းထားသလို စစ်တပ်နဲ့ AA အဖွဲ့ကြား တိုက်ပွဲတွေ ထပ်မဖြစ်အောင် ဆောင်ရွက်သွားမယ်လို့ မြန်မာနိုင်ငံ အမျိုးသားပြန်လည်သင့်မြတ်ရေး အထူးကိုယ်စားလှယ် မစ္စတာ ဆာဆာကာဝါက ပြောပါတယ်။

“တချက်ပဲ ကျနော်ပြောပြလို့ရတာ ရှိပါတယ်။ အဲဒါဘာလဲဆိုရင် အခုလက်ရှိ ငြိမ်းချမ်းနေတဲ့အနေအထားကို ဆက်ပြီးတော့ ထိန်းသိမ်းထားနိုင်ဖို့ အပစ်အခတ်လုံးဝမလုပ်ဖို့ တဘက်နဲ့ တဘက် ဆက်သွယ်ဆောင်ရွက်သွားမယ့်အကြောင်း၊ အပစ်အခတ်လုံးဝမလုပ်ဖို့အကြောင်းကို အောက်ခြေတပ်သားအထိ ညွှန်ကြားထားဖို့အတွက်ကို သူတို့ကို ပြောကြားထားပြီးဖြစ်ပါတယ်။ နှစ်ဘက်ထိတွေ့မှု လုံးဝ မဖြစ်အောင် ဆက်ပြီး ထိန်းသိန်းသွားမှာ ဖြစ်ပါတယ်။”

သူမြန်မာနိုင်ငံကို ရောက်ရောက်ချင်း နိုဝင်ဘာ ၁၂ ရက်နေ့က AA အဖွဲ့ခေါင်းဆောင်တွေနဲ့ အွန်လိုင်းကနေ တွေ့ဆုံဆွေးနွေးခဲ့တယ်လို့လည်း ပြောပါတယ်။ ၂၀၂၀ ခုနှစ် နိုင်ဝင်ဘာလမှာ ရခိုင်ပြည်နယ်ကို လာရောက်ခဲ့ပြီး အခု ဒုတိယအကြိမ်လာခဲ့တာနဲ့ပတ်သက်လို့လည်း Mr. Sasakawa ကခုလို ပြောပါတယ်။

“ဟုတ်ကဲ့ခင်ဗျာ။ ကျနော်လာရတဲ့ ရည်ရွက်ချက်ဟာ အပစ်အခတ်ရပ်စဲသွားတဲ့နောက်ပိုင်းမှာ လာရောက်ပြီးတော့ လေ့လာတာဖြစ်ပါတယ်။ အဲဒီအပြင် IDP စခန်းတွေရဲ့ အနေအထားတွေကို လာရောက်ပြီးတော့မှ ကျနော်တို့ ဘာများ အကူအညီပေးနိုင်မလဲဆိုတာကို လေ့လာတာဖြစ်ပါတယ်။ အခု ငြိမ်းချမ်းရေး အကောင် အထည်ဖော်တာနဲ့ ပတ်သက်ပြီးတော့မှ ငြိမ်းချမ်းရေးဖော်ဆောင်မယ်ဆိုရင် အပစ်အခတ်ရပ်စဲရးဟာ ပထမဖြစ်ပါတယ်။ ငြိမ်းချမ်းရေးအတွက် အပစ်ရပ်ထားတာ တနှစ်ပြည့်ပြီဖြစ်ပါတယ်။ ဆက်ပြီးတော့ ငြိမ်းချမ်းရေဒအတွက် လူကြီးမင်းများ အားလုံးပါဝင်ဆောင်ရွက်ရမှာဖြစ်ပါတယ်။”

မြန်မာနိုင်ငံအမျိုးသားပြန်လည်သင့်မြတ်ရေးဆိုင်ရာ ဂျပန်အစိုးရရဲ့အထူးကိုယ်စားလှယ်လည်းဖြစ်၊ နီပွန်ဖောင်ဒေးရှင်းဥက္ကဋ္ဌလည်းဖြစ်တဲ့ Mr. Yohei Sasakawa ကရခိုင်ပြည်နယ် ခရီးစဉ်အတွင်း ပြည်နယ် ကောင်စီတာဝန်ရှိသူတွေနဲ့ တွေ့ဆုံခဲ့ပေမယ့်လည်း တွေ့ဆုံနှုတ်ဆက်တဲ့ သဘောသာဖြစ်ပြီး တစုံတရာ ဆွေးနွေးတိုင်ပင်ခဲ့တာ မရှိဘူးလို့ ပြည်နယ်ကောင်စီပြောခွင့်ရ ဦးလှသိန်းကပြောပါတယ်။ ရခိုင်အမျိုးသားပါတီ ANP နဲ့လည်း သီးခြားတွေ့ဆုံခဲ့တာ ရှိပြီး အဲဒီတွေ့ဆုံပွဲမှာတော့ စစ်တပ်နဲ့ AA အဖွဲ့တို့ရဲ့လက်ရှိ အခြေအနေတွေကို တင်ပြလိုက်တယ်လို့လည်း ANP ပါတီဘက်ကပြောပါတယ်။

https://www.facebook.com/VoA.Burmese.News/posts/10159544114050170

Leave a Reply

Your email address will not be published.