မောင်တောမှ ဆင်နင်းခံရသည့်အမျိုးသားတစ်ဦး ဆေးကုသရန် အကူအညီလိုအပ်နေ

By Development Media Group (DMG)/ 2021 November 30

ရခိုင်ပြည်နယ်၊ မောင်တောမြို့နယ်၊ မီးတိုက်ကျေးရွာမှ ဆင်နင်းခံရသည့် အမျိုးသားတစ်ဦးမှာ ဆေးကုသမှုခံယူရန် အကူအညီလိုအပ်နေကြောင်း မိသားစုများထံမှသိရသည်။

အသက်(၅၈)နှစ်အရွယ် ဦးဂုန်ဒီယာမှာ နိုဝင်ဘာလ ၂၉ ရက်နေ့က နွားပျောက်ရှာသွားစဉ် တောဆင်ရိုင်းနှင့်တွေ့ကာ ရန်ပြုခံခဲ့ရခြင်းဖြစ်သည်။

ဦဂုန်ဒီယာ၏သမီးကြီးဖြစ်သူ အသက် ၃၀ ကျော်အရွယ် ဒေါ်တင့်တင့်သန်းက “ကျွန်မအဖေက သူများနွားတွေကို အငှားကျောင်းနေတာ။ အဲဒီနေ့က နွားတစ်ကောင်ပျောက်သွားလို့သွားရှာရာက ဆင်နင်းခံရတာ။ ဆင်းရဲတဲ့မိသားစုဆိုတော့ ဆေးကုသဖို့ငွေကြေားအခက်အခဲဖြစ်နေတယ်” ဟု DMG သို့ ပြောသည်။

ဆင်နင်းခံခဲ့ရသည့် ဦးဂုန်ဒီယာမှာ ခြေနှစ်ဖက်၊ ဘယ်ဖက်မျက်လုံးနှင့် ဝမ်းဗိုက်တို့တွင် ဒဏ်ရာများရရှိထားကြောင်း ရခိုင်ပြည်နယ် မရာမာကြီးလူငယ်ကွန်ယက်မှ ထုတ်ပြန်ထားသည်။

အဆိုပါ မရာမာကြီးလူငယ်ကွန်မှ အဖွဲ့ဝင် ဦးလှတင့်က “အခုတော့ မောင်တောဆေးရုံမှာ ဆေးကုသမှုခံယူနေတယ်။ သတိတော့ရတယ်။ ဒါပေမဲ့စကားမပြောနိုင်သေးဘူး။ သူ့မိသားစုက ဆင်းရဲတော့ ဆေးကုသဖို့အတွက်ငွေကြေးလိုအပ်နေတယ်။ ကူညီနိုင်မယ့်အလှူရှင်တွေကို ကူညီပေးကြဖို့ တောင်းဆိုချင်ပါတယ်”ဟု ပြောသည်။

ဆင်နင်းခံရသည့် မရာမာကြီးအမျိုးသား ဦးဂုန်ဒီယာတွင် သားသမီးသုံးဦးရှိပြီး နွားအငှားကျောင်းကာ မိသားစုကို ရှာဖွေကျွေးမွေးနေသူဖြစ်သည်။

မောင်တောမြို့နယ်နှင့် ဘူးသီးတောင်မြို့နယ်တို့တွင် တောဆင်များကို မကြာခဏတွေ့ရလေ့ရှိပြီး ဒေသခံများမှာ တောတောင်သို့သွားရောက်ရန် စိုးရိမ်မှုများရှိနေကြသည်။

https://www.facebook.com/dmgnewsagency/posts/2170200916465641

Leave a Reply

Your email address will not be published.