မောင်တောမြို့နယ်တွင် ARSA နှင့် နယ်ခြားစောင့်ရဲတပ်ဖွဲ့တို့ တိုက်ပွဲဖြစ်ဟု ဒေသခံများပြော

By Development Media Group (DMG)/ 2021 November 1

ရခိုင်ပြည်နယ်၊ မောင်တောမြို့နယ်မြောက်ပိုင်း လိပ်ရနယ်မြေအပိုင် ဇီးပင်ချောင်းကျေးရွာဟောင်းအနီးတွင် ARSA နှင့် နယ်ခြားစောင့်ရဲတပ်ဖွဲ့တို့ အောက်တိုဘာလ ၃၁ ရက်နေ့က တိုက်ပွဲဖြစ်ပွားခဲ့ကြောင်း ဒေသခံများ၏ပြောကြားချက်အရ သိရသည်။

နယ်ခြားစောင့်ရဲတပ်ဖွဲ့ဝင်များမှ နယ်မြေရှင်းလင်းဆောင်ရွက်စဉ် ARSA အဖွဲ့မှစခန်းချထားသည့်နေရာအားတွေ့ရှိကာ တိုက်ပွဲဖြစ်ပွားခဲ့ခြင်းဖြစ်ပြီး ARSA အဖွဲ့ဝင်ငါးဦးကို သေနတ် ၂ လက်နှင့်အတူ ဖမ်းမိခဲ့သည်ဟုသိရကြောင်း မောင်တောမြို့နယ်မြောက်ပိုင်း နံသာတောင်ကျေးရွာအုပ်ချုပ်ရေးမှူး ဦးအထွန်းချေကပြောသည်။

“ဇီးပင်ချောင်းရွာဟောင်းဖက်ကို နယ်ခြားစောင့်တပ်တွေက မနေ့က မနက် ၈ နာရီလောက်မှာ နယ်မြေရှင်းလင်းရေးလုပ်တာမှာ ARSA အဖွဲ့ စခန်းချနေတဲ့နေရာကိုတွေ့ရှိပြီး တိုက်ပွဲဖြစ်ကြတယ်လို့သိရတယ်။ ARSA အကြမ်းဖက်အဖွဲ့ ၅ ဦးကို လက်နက် ၂ လက်နဲ့အတူဖမ်းမိတယ်လို့သိရတယ်”ဟု ဦးအထွန်းချေက DMG သို့ပြောသည်။

အဆိုပါတိုက်ပွဲဖြစ်ပွားသည့်နေရာမှာ နယ်ခြားစောင့်ရဲတပ်ဖွဲ့ခွဲ နယ်မြေ ၇ အပိုင်ဖြစ်ပြီး ယခင်က မွတ်ဆလင်ကျေးရွာများရှိခဲ့သည့် နေရာဖြစ်သည်။

မောင်တောမြို့နယ် ပြည်နယ်လွှတ်တော်ကိုယ်စားလှယ်ဟောင်း ဦးထွန်းလှစိန်က “အဲဒီဖက်မှာ မူးယစ်ဆေးသယ်ယူရောင်းဝယ်မှုတွေရှိတယ်။ သူတို့နဲ့ထိတွေ့ပြီး တိုက်ပွဲဖြစ်တာဖြစ်နိုင်တယ်။ လူ ၅ ဦးနဲ့ သေနတ် ၂ လက်ဖမ်းမိထားတယ်လို့ စုံစမ်းသိရှိရတယ်”ဟု ပြောသည်။

ARSA နှင့် နယ်ခြားစောင့်ရဲတပ်ဖွဲ့ တိုက်ပွဲဖြစ်ပွားခဲ့သည်ဆိုသည့် သတင်းနှင့်ပတ်သက်ပြီး မောင်တောမြို့နယ်အုပ်ချုပ်ရေးမှူး ဦးကံထွန်းအောင်က ၎င်းအနေဖြင့် မသိရသေးကြောင်းပြောသည်။

မောင်တောဒေတွင် ယခင်က မွတ်ဆလင်ကျေးရွာပေါင်း ၂၀၀ ကျော်ရှိခဲ့သော်လည်း ၂၀၁၇ ခုနှစ် အကြမ်းဖက်ဖြစ်စဉ်အတွင်း မွတ်ဆလင်ကျေးရွာ ၁၀၀ ကျော်ခန့် မီးလောင်ပျက်ဆီးခဲ့ကြောင်း သိရသည်။

ယခု ARSA အဖွဲ့များစခန်းချနေထိုင်သည့် ဇီးပင်ချောင်းကျေးရွာမှာ ယခင်ကအိမ်ခြေထောင်ချီရှိခဲ့သည့် မွတ်ဆလင်ကျေးရွာတစ်ရွာဖြစ်ပြီး လူနေထိုင်မှုမရှိဘဲကြာမြင့်လာသဖြင့် ယခုအခါသစ်ပင်ခြုံနွယ်များဖုံးလွှမ်းကာ တောကြီးသဖွယ်ဖြစ်နေကြောင်း သိရသည်။

https://www.facebook.com/dmgnewsagency/posts/2146538778831855

Leave a Reply

Your email address will not be published.