ရခိုင်ပြည်နယ် ၁၇ မြို့နယ်မှ ခက်ခဲစွာကျောင်းတက်နေရသော ကျောင်းသားများအတွက် We Love Rakhine မှ စက်ဘီးများလှူဒါန်း

By Development Media Group (DMG)/ 2021 October 22

ရခိုင်ပြည်နယ်၊ မြို့နယ် ၁၇ မြို့နယ်မှ လမ်းပန်းဆက်သွယ်ရေး ခက်ခဲစွာဖြင့် ကျောင်းတက်နေရသည့် ကျောင်းသား/ကျောင်းသူများအတွက် We Love Rakhine အဖွဲ့မှ ဂျပန်နိုင်ငံထုတ် စက်ဘီးအစီး ၃၀၀ ကို လှူဒါန်းပေးခဲ့ကြောင်း သိရသည်။

အဆိုပါစက်ဘီးများကို အောက်တိုဘာ ၁၇ နေ့မှစတင်၍ လှူဒါန်းပေးနေခြင်းဖြစ်ပြီး မြောက်ဦးမြို့နယ်မှ ကုလားကကျေးရွာ၊ ကင်းဆိပ်ကျေးရွာနှင့် ပုဏ္ဏားကျွန်းမြို့နယ်မှ ဆင်အင်းကြီးကျေးရွာ စသည့်ကျေးရွာများမှ ကျောင်းသား/ကျောင်းသူများကို စက်ဘီးများ လှူဒါန်းပေးခဲ့ကြောင်း We Love Rakhine အဖွဲ့ထံမှ သိရသည်။

ရခိုင်မြို့နယ်အတွင်း ကျေးရွာအချို့မှ ကျောင်းသားကျောင်းသူများမှာ စာသင်ကျောင်းသို့ ၃ မိုင်ခန့် ခြေလျင်သွားကျောင်းတက်နေရသဖြင့် ကျောင်းသွားကျောင်းပြန် အဆင်ပြေစေရန်အတွက် စက်ဘီးများလှူဒါန်းပေးခြင်းဖြစ်သည်ဟု We Love Rakhine အဖွဲ့မှ ဒုဥက္ကဋ္ဌ ဦးတင်ငြိမ်းဦးကပြောသည်။

“စစ်ဘေးရှောင်စခန်းကသူတွေလည်း ပါချင်ပါမယ်။ အဓိက ကျောင်းကို ၂ မိုင် ၃ မိုင်လောက်လမ်းလျှောက်ပြီး ကျောင်းတက်နေရတဲ့ ကျောင်းသူကျောင်းသားတွေပေါ့နော်။ မရှိဆင်းရဲသားတွေ ၊ မိဘဆင်းရဲနွမ်းပါးတဲ့သူတွေအနေနဲ့ ကျောင်းတက်လို့အဆင်ပြေအောင်ရည်ရွယ်ပြီး ကျေးရွာလူကြီးတွေနဲ့အတူ မြို့နယ်တိုင်းမှာရှိတဲ့ We love Rakhine EC တွေကရွေးချယ်ပြီး လှူပေးတာဖြစ်ပါတယ်”ဟု ဆိုသည်။

အဆိုပါကျေးရွာများတွင် စက်ဘီးများလှူဒါန်းထားပြီး ထပ်မံ၍ အခြားမြို့နယ်အတွင်းမှ ကျောင်းတက်ရန် လမ်းပန်းဆက်သွယ်ရေး အခက်အခဲဖြစ်နေသော ကျောင်းသား/ကျောင််းသူများကိုလည်း အသုတ်လိုက်လှူဒါန်းပေးသွားမည်ဖြစ်ကြောင်း ဦးတင််ငြိမ်းဦးက ဆက်လက်ပြောကြားသည်။

အဆိုပါစက်ဘီးများမှာ ဂျပန်နိုင်ငံမှ အလှူရှင်တစ်ဦးက We Love Rakhine ကို လှူဒါန်းထားခြင်းဖြစ်ပြီး ယင်းမှတဆင့် ရခိုင်ပြည်နယ်အတွင်းရှိ စာသင်ကျောင်းသို့ သွားလာရေး အခက်အခဲရှိနေသော ကျောင်းသား၊ကျောင်းသူများကို ထပ်မံလှူဒါန်းပေးခြင်းဖြစ်သည်။

ယခုကဲ့သို့ We Love Rakhine အဖွဲ ့မှ စက်ဘီးထောက်ပံ့ပေးသဖြင့် ဝမ်းသာမိကြောင်း ဆင်အင်းကြီးကျေးရွာမှ ကျောင်းသား ဖခင်တစ်ဦးဖြစ်သည့် ဦးမောင်လှကဆိုသည်။

“အခုလိုမျိုး ထောက်ပံ့ပေးတဲ့အတွက် ဝမ်းသာပါတယ်။ ကျနော်တို့သား၊သမီးတွေ ကျောင်းတက်သွားတဲ့အခါ အရင်လိုအချိန်တွေလည်း ကြန့်ကြာမနေတော့ဘူး။ ပင်လည်းမပင်ပန်းတော့ဘူးပေါ့နော်။ ပိုပြီးအဆင်ပြေသွားပါတယ်“ဟု ၎င်းကဆိုသည်။

We Love Rakhine အနေဖြင့် ပညာရေးနှင့်သော်လည်းကောင်း၊ ကျန်းမာရေးနှင့်သော်လည်းကောင်း လိုအပ်ချက်များကို အခါအားလျော်စွာ ထောက်ပံ့လှူဒါန်းမှုများ ဆက်လက်လုပ်ဆောင်သွားရန်စီစဉ်နေကြောင်းလည်း ယင်းအဖွဲ့ထံမှ သိရသည်။

https://www.facebook.com/dmgnewsagency/posts/2138779562941110

Leave a Reply

Your email address will not be published.