ရိုဟင်ဂျာဒုက္ခသည်အရေး စစ်ကောင်စီနဲ့ ဘင်္ဂလားဒေ့ရှ် ဆွေးနွေးမှုမရှိသေး

By VOA/ 2021 September 17

ဘင်္ဂလားဒေ့ရှ်နိုင်ငံဘက် ရောက်နေတဲ့ ရိုဟင်ဂျာ ဒုက္ခသည်တွေ နေရပ်ပြန်ပို့ရေးကိစ္စနဲ့ ပတ်သက်လို့ မြန်မာစစ်ကောင်စီနဲ့ ဘင်္ဂလားဒေ့ရှ် နှစ်နိုင်ငံအကြား တိုက်ရိုက်ဆွေးနွေးမှု မရှိသေးတဲ့အကြောင်း ဘင်္ဂလားဒေ့ရှ် နိုင်ငံခြားရေးဝန်ကြီး AK Abdul Momen ပြောကြားချက်ကို ဘင်္ဂလားဒေ့ရှ်နိုင်ငံထုတ် bdnews24 သတင်းမှာ ဖေါ်ပြပါတယ်။

ရိုဟင်ဂျာဒုက္ခသည်တွေ ပြန်ပို့ရေး တရုတ်နိုင်ငံပါ ပါဝင်တဲ့ မြန်မာ၊ တရုတ်၊ ဘင်္ဂလားဒေ့ရှ် သုံးနိုင်ငံအကြား ဒီနှစ်ဆန်းက ဆွေးနွေးမှုတွေရှိခဲ့ပေမဲ့ ပြန်ပို့ရေးလုပ်ငန်းစဉ်တွေ ရပ်တန့်နေဆဲ ဖြစ်တဲ့အကြောင်းလည်း ဝန်ကြီး AK Abdul Momen က ဒက္ကာမြို့တော်မှာ မနေ့က သတင်းထောက်တွေကို ပြောဆိုတာပါ။

တရုတ်နိုင်ငံကတော့ မြန်မာစစ်ကောင်စီအနေနဲ့ တိုင်းပြည်တည်ငြိမ်အောင် ပထမကြိုးစားနေပြီး အခြေအနေတွေ တည်ငြိမ်သွားတဲ့အခါ ဒုက္ခသည်ပြန်ပို့ရေးကိစ္စတွေ ဆွေးနွေးမယ့်အကြောင်း ပြောဆိုတယ်လို့ ဘင်္ဂလားဒေ့ရှ် နိုင်ငံခြားရေးဝန်ကြီးက ပြောပါတယ်။ မြန်မာစစ်ကောင်စီဘက်က ရိုဟင်ဂျာဆိုတဲ့ အသုံးအနှုန်းကို လက်မခံပါဘူး။

ဒါပေမဲ့လည်း အရင်အစိုးရနဲ့ သဘောတူခဲ့တဲ့ ဒုက္ခသည် ပြန်လည်လက်ခံရေး သဘောတူညီချက်တွေကို အကောင်အထည်ဖော်မယ်လို့တော့ ဘင်္ဂလားဒေ့ရှ် နိုင်ငံခြားရေးဝန်ကြီးက မျှော်လင့်နေပါတယ်။

ဒုက္ခသည်ပြန်ပို့ရေး အစီအစဉ်တွေအတွက် NLD အမျိုးသားဒီမိုကရေစီအဖွဲ့ချုပ် ဦးဆောင်တဲ့ အရပ်သား အစိုးရလက်ထက် လွန်ခဲ့တဲ့ ၄ နှစ်ကတည်းက မြန်မာနဲ့ ဘင်္ဂလားဒေ့ရှ် နှစ်နိုင်ငံ သဘောတူညီခဲ့ကြပါတယ်။

ဒါပေမဲ့လည်း ဒုက္ခသည်တွေကိုယ်တိုင်က ပြန်ဖို့ ငြင်းဆန်ကြတာကြောင့် ၂၀၁၉ ခုနှစ်မှာ နှစ်ကြိမ် မအောင်မမြင် ဖြစ်ခဲ့တဲ့အကြောင်းနဲ့ နောက်ပိုင်းမှာ ပြန်ပို့ရေးအစီအစဉ် ရပ်တန့်နေတဲ့အကြောင်း ဘင်္ဂလားဒေ့ရှ်နိုင်ငံခြားရေးဝန်ကြီးက ပြောဆိုပါတယ်။

https://www.facebook.com/VoA.Burmese.News/posts/10159423030280170

Leave a Reply

Your email address will not be published.