ရခိုင်ပြည်နယ်တွင်း ကုန်ဈေးနှုန်းနဲ့စက်သုံးဆီ နှစ်ဆမြင့်တက်လာ

By VOA/ 2021 September 28

စစ်တပ်က အာဏာသိမ်းပြီးနောက်ပိုင်း မြန်မာနိုင်ငံတဝှမ်း ကုန်ဈေးနှုန်းတွေတက် လာသလိုပဲ ဖွံ့ဖြိုးတိုးတက်မှု နောက်အကျဆုံးဖြစ်တဲ့ ရခိုင်ပြည်နယ်မှာလည်း ကုန်ဈေးနှုန်းတွေနဲ့ စက်သုံးဆီဈေးတွေ နှစ်ဆလောက်အထိ မြင့်တက်လာနေပါတယ်။ အထူးသဖြင့် နိုင်ငံခြားသွင်းကုန်ဈေးနှုန်းတွေ ပိုပြီးတော့မြင့်တက်လာနေတာပါ။ ဈေးနှုန်းမြင့်တက်လာတဲ့အမျှ ပြည်သူတွေ အခက်တွေ့လာနေရတဲ့အကြောင်းရန်ကုန်ကပေးပို့တဲ့သတင်းကို ကိုငြိမ်းချမ်းက တင်ပြပေးထားပါတယ်။

စစ်တပ်က အာဏာသိမ်းပြီးနောက်ပိုင်း မြန်မာနိုင်ငံမှာ ဒေါ်လာဈေး မြင့်တက်လာနေတာကြောင့် လောင်စာဆီဈေးနှုန်းတွေလည်း မြင့်တက်လာနေတာပါ။ တဆက်တည်းဆိုသလိုပဲ ကုန်ဈေးနှုန်းတက်လာသလို ရခိုင်ပြည်မှာဆိုရင် ကုန်ဈေးနှုန်းရော စက်သုံးဆီဈေးပါ နှစ်ဆလောက်အထိ တက်လာတယ်လို့ ကုန်သည်တွေကပြောပါတယ်။ စက်သုံးဆီဈေးတွေ နေ့စဉ်တက်လာပေမယ့် ပြန်ကျမယ့် အနေအထားမရှိဘူးလို့ ရခိုင်ပြည်နယ် စက်သုံးဆီများ အသင်း ယာယီဥက္ကဋ္ဌ ဦးသန်းလှိုင်က ပြောပါတယ်။

“ဆီဈေးတက်တာက နှစ်ချက်ရှိတာပေါ့။ နံပါတ်တစ်ကတော့ ကမ္ဘာ့ဈေးတက်ရင် ဆီဈေးတက်တယ်။ နံပါတ်နှစ်က ဒေါ်လာဈေးတက်ရင် ဆီဈေးတက်မှာပဲ။ အဲဒီနှစ်ချက်လုံး ဆုံလာရင် ပိုပြီးတက်သွားတာပေါ့။ တက်တာကတော့ တောက်လျှောက် အတက်ချည့်ပဲရှိတယ်။ ဒီနှစ်လ သုံးလလောက်မှာပေါ့နော်။ အစရှိသဖြင့် အတက်ပဲ ရှိတယ်။ ပြန်ကျသွားတာမရှိဘူး။ ကမ္ဘာ့ဈေးက တက်လိုက် ကျလိုက်ရှိနေတယ်ဆိုပေမယ့် ဒေါ်လာဈေးကြောင့် အကျမှာတော့မရှိဘူး။ နေ့တိုင်းတက်နေတယ်။ အရင်ကဆိုရင် ကျနော်တို့ တလီတာကို တထောင်ဝန်းကျင်နဲ့ ရောင်းနေတာ တထောင်အောက်မှာလည်း ရှိခဲ့တာပေါ့။ အခုဆိုရင် တလီတာကို ၁,၅၀၀ လောက်ဖြစ်လာတယ်ပေါ့။ ထက်ဝက်လောက် တက်လာတဲ့ သဘောရှိနေတယ်။”

စစ်တပ်က အာဏာမသိမ်းခင်က စက်သုံးဆီ တလီတာကို တထောင်ဝန်းကျင် လောက်သာရှိပေမယ့်လည်းလက်ရှိမှာတော့ ဒီဇယ်တဂါလံကို ၆,၀၄၀၊ ၈၂ တလီတာကို ၁,၅၂၀ ကျပ်နဲ့ ကျန်တဲ့ စက်သုံးဆီဈေးနှုန်းတွေဟာလည်း ၁,၅၀၀ ကျော်ရှိနေပါတယ်။ ရောင်းချတဲ့ မြို့နယ်တွေပေါ်မူတည်ပြီး ဈေးနှုန်း ကွာခြားမှုတွေလည်း ရှိနေတာပါ။

ရခိုင်ပြည်နယ်အတွက် စက်သုံးဆီတွေကို သီလဝါအထူးစီးပွားရေးဇုန်ကနေ တင်သွင်းနေရတာဖြစ်ပြီး ဒေါ်လာဈေးတွေတက်လာနေတာကြောင့်စက်သုံးဆီပြတ်လပ်တာတွေ ရှိလာမှာကို စိုးရိမ်ရတယ်လို့ရခိုင်ပြည်နယ် စက်သုံးဆီများ အသင်း ယာယီဥက္ကဋ္ဌ ဦးသန်းလှိုင်က ပြောပါတယ်။

“ကျနော်အကြံပြုချင်တာကတော့ သီလဝါကနေပြီးတော့ တပြေးညီဈေး ရောင်းချပေးနိုင်ရင်တော့ အကောင်းဆုံးပါ။ အဲဒါဆိုရင် ကျနော်တို့က ဆိုင်တွေကိုလည်း ဘယ်ဈေးရောင်းဆိုပြီး သတ်မှတ်ပေးလို့ ကောင်းတာပေါ့။ အဲဒီ သီလဝါကနေပြီး တည်ငြိမ်ဖို့လိုတာပေါ့။ သီလဝါကမငြိမ်ရင် ကျနော်တို့ ဆီမှာလည်း အများကြီးအခက်အခဲရှိပါတယ်။ ဘာကြောင့်လဲဆိုတော့ အဲဒီဟာပဲ မှီခိုပြီးလာရတာဖြစ်လို့လေ။ စက်သုံးဆီများအသင်းအနေနဲ့တော့ ရခိုင်ပြည်နယ်မှာ စက်သုံးဆီမပြတ်လပ်ဖို့ ကြိုးစားဆောင်ရွက်နေတယ်။ ပြတ်လပ်သွားမှာကိုလည်း ကြောက်နေတာပေါ့။”

စက်သုံးဆီးဈေးနှုန်းတွေမြင့်တက်လာတာနဲ့အမျှ လူသုံးကုန်ပစ္စည်းတွေရဲ့ ဈေးနှုန်း တွေလည်း မြင့်တက်လာနေသလို စက်သုံးဆီသုံးဆက်စပ်လုပ်ငန်းတွေမှာလည်း ထိခိုက်မှုတွေရှိလာနေပါတယ်။ရခိုင်ပြည်နယ်မှာ ပြည်မကတင်သွင်းရတဲ့ စားသောက်ကုပစ္စည်းတွေဟာ ဖေဖော်ဝါရီလ နောက်ပိုင်းက စပြီး နှစ်ဆနီးပါး တက်လာတယ်လို့ ရခိုင်ပြည်နယ် နယ်စပ်ကုန်သွယ်ရေး လုပ်ငန်းရှင်များအသင်း အတွင်းရေးမှူး ကိုအောင်အောင်က ပြောပါတယ်။

“ဖေဖော်ဝါရီလ မတိုင်ခင်နဲ့ ဖေဖော်ဝါရီလ နောက်ပိုင်းကိုပဲ ယှဉ်ပြီးပြောရရင် ၈၀ ရာခိုင်နှူန်းလောက် တက်သွားတာပေါ့။ စားအုန်းဆီတွေဆိုရင် အရင်တုန်းက ၂,၃၀၀ နဲ့ ၂,၂၀၀ ဝန်းကျင် လောက်မှာ ရှိတယ်။ အခုဆိုရင်တော့ ၄,၅၀၀ လောက် ရှိတယ်။ နှစ်ဆနီးပါးလောက် တက်တာပေါ့ဗျာ။ အဓိက ကျနော်တို့ ရခိုင်ဘက် မှာက ပြည်မကို အဓိက မှီခိုရတာဆိုတော့ စက်သုံးဆီရယ်၊ စားအုန်းဆီရယ်၊ နောက်နိုင်ငံခြားသွင်းကုန်တွေပေါ့နော်။ ပြီးတော့ ဆောက်လုပ်ရေးပစ္စည်းတွေပေါ့နော်။ အဲဒီမှာလည်း သံချောင်းဈေးနှူန်းတွေ၊ ဘိလပ်မြေဈေးနှူန်းတွေ တက်လာတာပေါ့ဗျာ။ စားသောက်ကုန်တွေကလည်း ပြည်မက တင်သွင်းရတဲ့ဟာတွေက ပိုတက် တာပေါ့နော်။ ပြည်တွင်း ထုတ်ကုန်တွေကတော့ ၆၀ % လောက်ပဲ တက်တာရှိတယ်။ ၅၀ % လောက် တတ်တာလည်းရှိတယ်။”

ရခိုင်ပြည်နယ်ရဲ့ အဓိက စားသောက်ကုန်တွေနဲ့ တခြား လူသုံးကုန်ပစ္စည်းတွေကို ပြည်မဘက်က အဓိကထား တင်သွင်းနေရတာဖြစ်ပါတယ်။ နိုင်ငံတဝှန်း စက်သုံးဆီဈေးတွေနဲ့ ဒေါ်လာဈေးတွေ မြင့်တက်လာနေတာကြောင့် ရခိုင်ပြည်နယ်အတွင်းမှာဆိုရင် အခြားပြည်နယ်တွေထက် ကုန်ဈေးနှုန်းတွေ ပို တက်လာတယ်လို့ ကုန်သည်တွေကပြောပါတယ်။

ကုန်ဈေးနှုန်းတွေမြင့်တက်တာကို လျော့ချဖို့ဆိုရင် အစိုးရအနေနဲ့လည်း ပြည်တွင်းထုတ်ကုန်တွေကို ရောင်းချပေးရမှာဖြစ်သလို ဒေါ်လာဈေးမြင့်တက်နေတာတွေကိုလည်း တည်ငြိမ်အောင် ထိန်းပေးသင့်တယ်လို့လည်း ရခိုင်ပြည်နယ် နယ်စပ်ကုန် သွယ်ရေး လုပ်ငန်းရှင်များအသင်း အတွင်းရေးမှူး ကိုအောင်အောင်က ပြောပါတယ်။

“ကျနော်မြင်တာကတော့ ငွေးကြေးဖောင်းပွမှု နှုန်းပေါ့နော်။ ငွေကြေးဖောင်းပွတာကို တည်ငြိမ်အောင်ထိန်းဖို့ပဲလိုတယ်။ အဓိကတချက်က။ နောက်တခုကတော့ ကျနော်တို့နိုင်ငံရဲ့ ပို့ကုန်ကို ရောင်းပေးရမယ်။ ဘာကြောင့်လဲဆိုတော့ ပို့ကုန်မရှိဘဲ အပြင်က နိုင်ငံခြားငွေဝင်လာဖို့ မဖြစ်နိုင်ဘူးလေ။ အခုဆိုရင် ကိုဗစ်ကြာင့် နယ်စပ်ဂိတ်တွေကလည်း အကုန်ပိတ်ထားတယ်။ ဒီလိုမျိုးသာ တင်ပို့မှုအားနည်းနေ မယ်ဆိုရင် နိုင်ငံထဲကို စီးဝင်လာမယ့်ငွေကြေး ပိုပြီးတော့ နည်းလာလေဖြစ်တယ်။ အဓိကလုပ်ရမှာက နိုင်ငံခြားငွေ တည်ငြိမ်ဖို့လိုတယ်။ တင်ငြိမ်ဖို့အတွက်လည်း နိုင်ငံခြားငွေအထဲကို ဝင်လာအောင်ဘယ်လိုလုပ်မလဲ။ အဲဒါတွေက ပိုပြီးတော့ အရေးပါမယ်လို့ ကျနော်မြင်တယ်။”

ကိုဗစ်ကူးစက်မှုကပ်ဘေးကာလမှာ လုပ်ငန်းတွေရပ်နားထားရသလို အလုပ်အကိုင် အခွင့်အလမ်းနည်းပါးတဲ့ ရခိုင်မှာ အခုလို ကုန်ဈေးနှုန်းဒဏ်ကြောင့် စားဝတ်နေရေးပိုခက်လာတယ်လို့လည်း ဒေသခံတွေကပြောဆိုကြပါတယ်။

https://www.facebook.com/VoA.Burmese.News/posts/10159444864370170

Leave a Reply

Your email address will not be published.