ရခိုင်က IDPs စခန်းနှင့် စစ်ဘေးရှောင်စခန်းများတွင် ကိုဗစ်ကာကွယ်ဆေးထိုးနှံမှု မြို့နယ် ၁၂ မြို့နယ်တွင်ပြီးစီး

By Development Media Group (DMG)/ 2021 September 29

ရခိုင်ပြည်နယ်မှ IDPs စခန်းများနှင့် စစ်ဘေးရှောင်စခန်းများတွင် တရုတ်နိုင်ငံထုတ် (Sinovac)ကိုဗစ်ကာကွယ်ဆေးထိုးနှံလျက်ရှိရာ လက်ရှိ ၁၂ မြို့နယ်တွင် ထိုးနှံပြီးစီးနေပြီဖြစ်ကြောင်း ပြည်နယ်ပြည်သူ့ကျန်းမာရေးဌာနမှ သိရသည်။

ရခိုင်က မြို့နယ် ၁၂ မြို့နယ်တွင် ပထမအကြိမ် ကိုဗစ်ကာကွယ်ဆေးထိုးပြီးသူ မွတ်ဆလင်ဒုက္ခသည်များနှင့် စစ်ဘေးရှောင်ဒုက္ခသည်စုစုပေါင်း ၅၀၀၀၀ ခန့်ကို ကိုဗစ်ကာကွယ်ဆေးထိုးပေးရန်အတွက် ရရှိထားသည့်ဆေးအလုံးရေ ၂၅၀၀၀ ကို စခန်းအလိုက်ခွဲတမ်းချပြီးထိုးပေးနေခြင်းမှာ ပြီးစီးနေပြီဖြစ်ကြောင်း သိရသည်။

“ရခိုင်မှာရှိတဲ့ မွတ်ဆလင်ဒုက္ခသည်စခန်းတွေနဲ့ စစ်ဘေးရှောင်တွေ ဆေးခွဲတမ်း လူဦးရေငါးသောင်းစာအတွက်ရထားတယ်။ အဲဒီဆေးတွေကို ကျွန်တော်တို့က မြို့နယ် ၁၂ မြို့နယ်မှာရှိတဲ့ လူဦးရေငါးသောင်းကိုထိုးပြီးသွားပါပြီ”ဟု ပြည်နယ်ပြည်သူ့ကျန်းမာရေးဌာနမှ လက်ထောက်ညွှန်ကြားရေးမှူး ဒေါက်တာစိုးဝင်းပိုင်က DMG သို့ပြောသည်။

ရခိုင်ပြည်နယ်တွင် ကိုဗစ်ကာကွယ်ဆေးထိုးရန် လူဦးရေ ၁၆ သိန်းရှိသည့်အနက် ၃ သိန်းခန့်ကိုထိုးပေးပြီးဖြစ်ကာ ကျန်သည့် လူဦးရေများကိုလည်း ဆေးရရှိသည့်အပေါ်မူတည်ပြီး ဆက်လက်ထိုးပေးသွားမည်ဖြစ်ကြောင်း ဒေါက်တာစိုးဝင်းပိုင်ကဆိုသည်။

လက်ရှိမှာ ကိုဗစ်ရောဂါကူးစက်မှု လျော့နည်းလာသော်လည်း ရောဂါပိုးကူးစက်မှုများတွေ ့နေဆဲဖြစ်သဖြင့် ပြည်သူလူထုများအနေဖြင့် မပေါ့ဆရန်နှင့် မိမိအသိစိတ်ဖြင့်နေထိုင်ကြရန်လိုအပ်ကြောင်း ကျန်းမာရေးဌာနက တိုက်တွန်းထားသည်။

သို့သော် ကိုဗစ်စည်းကမ်းနှင့်ပတ်သက်ပြီး လက်ရှိမှာ အားနည်းလာနေကြောင်း ဝံလက်ဒေသဖွံ့ဖြိုးရေးဖောင်ဒေးရှင်း အမှုဆောင်ဒါရိုက်တာ ဦးခိုင်ကောင်းစံက ထောက်ပြပြောဆိုထားသည်။

“အခုဆိုရင် ပြည်သူလူထုတွေက ကိုဗစ်နဲ့ပတ်သက်ပြီးတော့ စည်းကမ်းလိုက်နာမှုတွေ တော်တော်ကိုအားနည်းနေတာကိုတွေ့ရတယ်။ နေရာတိုင်းမှာဆိုသလို လူစုလူဝေးတွေ့နေရတယ်။ စျေးတွေမှာဆိုရင်လည်း Mask မတပ်သူတွေအများကြီးပဲ။ အစိုးရကတော့ အရေးယူနေတယ်လို့ပြောတယ်၊ ဒါပေမဲ့ အရေးယူတာတွေက ထိရောက်မှုမရှိဘူး”ဟု ၎င်းကဆိုသည်။

ကိုဗစ်တတိယလှိုင်းကို အမြန်ဆုံးထိန်းချုပ်နိုင်ရန် ကိုဗစ်ကာကွယ်၊ ကုသရေးလုပ်ငန်းများကို တိုးမြှင့်ဆောင်ရွက်နေကြောင်း ဗဟိုကူးစက်ရောဂါတိုက်ဖျက်ရေးဌာနမှ ညွှန်ကြားရေးမှူး ဒေါက်တာခင်ခင်ကြီးက DMG သို့ ပြောကြားထားသည်။

“ကိုဗစ်တွေ့ရှိမှုကတော့ လက်ရှိမှာ ကျဆင်းလာတဲ့အနေအထားရှိတယ်။ ဒါပေမဲ့ အောက်ခြေအထိရောက်ဖို့ဆိုတာကတော့ အချိန်ယူရအုံးမှာဖြစ်တယ်“ဟု ၄င်းကပြောကြားသည်။

ရခိုင်ပြည်နယ်တွင် ကိုဗစ်ပထမလှိုင်းနှင့် ဒုတိယလှိုင်းနှစ်ခုအတွင်း သေဆုံးသူ ၃၇ ဦးရှိခဲ့ပြီး ယခုတတိယလှိုင်းတွင် သေဆုံးသူ ဦးရေမှာ စက်တင်ဘာ ၂၈ ရက်နေ့အထိ ၄၆၈ ဦးရှိလာနေပြီဖြစ်ကြောင်း ပြည်နယ်စစ်ကောင်စီမှ ထုတ်ပြန်သည့် စာရင်းအရသိရသည်။

ယင်းအပြင် တစ်ပြည်နယ်လုံးတွင် ကိုဗစ်ရောဂါပိုးကူးစက်ခံရသူ ၄၈၄၄ ဦး၊ ဆေးရုံမှဆင်းခွင့်ရသူ ၄၂၅၂ ဦးအထိရှိကြောင်းလည်း သိရသည်။

https://www.facebook.com/dmgnewsagency/posts/2120988218053578

Leave a Reply

Your email address will not be published.