By Narinjara/ 2021 September 27
သန္တာကျော်ဇော
ရခိုင်ပြည်နယ်၊ ဂွမြို့နယ်တွင် စစ်အာဏာသိမ်းမှုကို ဆန့်ကျင်ဆန္ဒပြမှုကြောင့် NLD ဂွမြို့နယ်မှ ၂၀၂၀ ရွေးကောက်ပွဲ အနိုင်ရ ပြည်သူ့ လွှတ်တော် ကိုယ်စားလှယ် ဦးရဲခေါင်ညွန့်၊ ရပ်ကွက်အုပ်ချုပ်ရေးမှူးတစ်ဦးနှင့် ဝန်းရံခဲ့သူတစ်ဦးတို့ကို ဂွမြို့နယ် တရားရုံးက ယနေ့ ထောင်ဒဏ်အသီးသီးချမှတ်လိုက်ကြောင်း သတင်းရရှိသည်။
ထောင်ဒဏ်ချမှတ်ခဲ့လိုက်ရသူများမှာ အနိုင်ရ NLD ဂွမြို့နယ် ပြည်သူ့လွှတ်တော်ကိုယ်စားလှယ် ဦးရဲခေါင်ညွန့်နှင့်အတူ ရွာမရပ်ကွက်အုပ်ချုပ်ရေးမှူး ဦးလူနီနှင့် ဆန္ဒပြရာတွင်ဝန်းရံခဲ့သူ ကိုအောင်စိုးမိုးတို့ဖြစ်ကြသည်။
၎င်းတို့အနက် ဦးရဲခေါင်ညွန့်ကို နိုင်ငံတော်အကြည်အညိုပျက်စေမှုပုဒ်မ ၅၀၅ (ခ)နှင့် ဘေးစီမံပုဒ်မအရ ထောင်ဒဏ် ၂ နှစ်နှင့် ၃ လ၊ ဦးလူနီကို ပုဒ်မ ၅၀၅ (ခ)အရ ထောင်ဒဏ် ၂ နှစ်နှင့် ကိုအောင်စိုးမိုးကို ဘေးစီမံပုဒ်မအရ ထောင်ဒဏ် ၅ လတို့အား ဂွမြို့နယ်တရားရုံးက ယနေ့ စက်တင်ဘာလ ၂၇ ရက် နံနက်တွင် အမိန့်ချမှတ်ခံခဲ့ရခြင်းဖြစ်ကြောင်း သိရသည်။
ဦးလူနီ၏သားဖြစ်သူ ကိုမြတ်ပိုင်စိုးက “ဒီနေ့နံနက်ပိုင်းက အမိန့်ချမှတ်လိုက်ပြီးတာနဲ့ တစ်ခါတည်း သံတွဲထောင်ကိုပြောင်းယူသွားတာပါ”ဟု နိရဥ္စရာသတင်းဌာနကို ပြောခဲ့သည်။
ယခုကိစ္စနှင့်ပတ်သက်ပြီး အဆိုပါအမှုအားလိုက်ပါဆောင်ရွက်ပေးခဲ့သည့်ရှေ့နေအား ဆက်သွယ်ခဲ့သော်လည်း တရားရုံးကိုသာမေးပါဟုပြောဆိုပြီး ဖုန်းချသွားခဲ့သည်။
ထောင်ဒဏ်ချမှတ်ခံရသူတို့သည် စစ်အာဏာသိမ်းပြီးနောက် ဖေဖော်ဝါရီလအတွင်း ဂွမြို့နယ်တွင် ဆန့်ကျင်ဆန္ဒပြမှုများတွင် ဦးဆောင်ပါဝင်ခဲ့သည်ဟုဆိုကာ ဖမ်းဆီးတရားစွဲဆိုခံခဲ့ရခြင်းဖြစ်သည်ဟု သိရသည်။
၎င်းတို့ ၃ ဦးအနက် ဦးရဲခေါင်ညွန့်သည် ဖေဖော်ဝါရီ ၁၁ ရက်တွင် ဖမ်းဆီးခံခဲ့ရခြင်းဖြစ်ပြီး ဦးလူနီနှင့် ကိုအောင်စိုးမိုးတို့သည် ဖေဖော်ဝါရီ ၁၃ ရက်တွင်ဖမ်းဆီးခံခဲ့ရခြင်းဖြစ်သည်ဟု သိရသည်။
https://www.facebook.com/narinjara.info/posts/4726324144046292