စစ်တွေဆတ်ရိုးကျချောင်းတွင် အမျိုးသားအလောင်းတစ်လောင်း တွေ့ရှိ

By Narinjara/ 2021 August 31

သဥ္ဇာနွယ်

ရခိုင်ပြည်နယ်၊ စစ်တွေမြို့ ဆတ်ရိုးကျရပ်ကွက်ရှိ ဆတ်ရိုးကျချောင်းတွင် ရေနစ်မြုပ်သေဆုံးနေသည့်အမျိုးသားအလောင်းတစ်လောင်းအား တွေ့ရှိခဲ့ကြောင်း သတင်းရရှိသည်။

အဆိုပါအလောင်းမှာ အသက် ၄ဝ ခန့်ရှိပြီး ယနေ့ သြဂုတ်လ ၃၁ ရက် နေ့လယ် ၁ နာရီခန့်တွင် ဒေသခံများက တွေ့ရှိခဲ့ခြင်းဖြစ်သည်ဟု အလောင်းအားသွားရောက်သယ်ယူခဲ့သည့် ရွှေရောင်မေတ္တာဖောင်ဒေးရှင်းမှ ကိုဒေးဗစ်က နိရဥ္စရာကိုပြောသည်။

“သေဆုံးသူက ဘယ်သူလဲဆိုတာကို ခန့်မှန်းမရကြသေးဘူး။ ရဲတွေနဲ့စစ်ဆေးနေတယ်။”ဟု ပြောသည်။

အဆိုပါအလောင်းကို ရွှေရောင်မေတ္တာဖောင်ဒေးရှင်းက စစ်တွေဆေးရုံရှိ ရင်ခွဲရုံသို့ ပို့ဆောင်ပေးခဲ့ရသည်ဟုလည်း သိရသည်။

ဆတ်ရိုးကျရပ်ကွက်အုပ်ချုပ်ရေးမှူး ဦးလှမောင်သန်းက “သေဆုံးသူက ကျနော်တို့ဘက်ကတော့ မဟုတ်ဘူး။ ဘယ်သူဖြစ်တယ်ဆိုတာလည်း မသိသေးဘူး။”ဟု နိရဥ္စရာကိုပြောသည်။

အဆိုပါကိစ္စနှင့်ပတ်သက်၍ စစ်တွေအမှတ် ၁ စခန်းမှူးကို ဆက်သွယ်ခဲ့သော်လည်း ဖုန်းလက်ခံဖြေကြားခြင်းမရှိခဲ့ပါ။

https://www.facebook.com/narinjara.info/posts/4639426732736034

Leave a Reply

Your email address will not be published.