By Narinjara/ 2021 July 15
ချစ်အိလှိုင်
ရခိုင်ပြည်နယ်၊ အမ်းမြို့ဆေးရုံကြီးတွင် ယနေ့နံနက် ၆ နာရီခန့်က ကိုဗစ်အတည်ပြုလူနာတစ်ဦး သေဆုံးသွားခဲ့ပြီး ရခိုင်ပြည်နယ်တွင် ကိုဗစ်တတိယလှိုင်းအတွင်း သေဆုံးသူ ၂၉ ဦးထိ ရှိနေပြီဖြစ်ကြောင်း သတင်းရရှိသည်။
အမ်းတွင် ယနေ့ သေဆုံးသူမှာ အသက်(၇ဝ)အရွယ်အမျိုးသမီးတစ်ဦးဖြစ်ပြီး ယမန်နေ့ ည ၁ဝ နာရီခန့်က အောက်ဆီဂျင်ကျ၍ ဆေးရုံသို့ရောက်ရှိလာသူဖြစ်ကြောင်းအမ်းဆေးရုံအုပ် ဒေါက်တာအောင်ကျော်မိုးက အတည်ပြုပြောကြားသည်။
“သူ့ရာဇဝင်ကတော့ ဖျားတာလေးရက်လောက်ရှိတယ်။ ချောင်းဆိုးတာ သုံးရက်လောက်ရှိတယ်။ ဆေးရုံကိုရောက်တဲ့အချိန်မှာမောနေတယ်။ အောက်ဆီဂျင်ရာခိုင်နှုန်းတအားကျတယ်ပေါ့။ ၂၉လောက်ပဲ ရှိတယ်ပေါ့။ ဒီနေ့ မနက်က ဆုံးသွားပါတယ်” ဟုပြောသည်။
အမ်းမြို့နယ်တွင် ယနေ့ ကိုဗစ်အတည်ပြုလူနာသေဆုံးမှုမှာ ကိုဗစ်တတိလှိုင်းအတွင်း ပထမဆုံး သေဆုံးမှုဖြစ်ကြောင်း သိရသည်။
အမ်းဆေးရုံကြီးတွင် လက်ရှိဆေးကုသမှုခံယူနေသည့် ကိုဗစ်အတည်ပြုလူနာ ၂၅ ဦးအနက် အောက်ဆီဂျင်ပေးထားရသူ ၃ ဦးရှိကြောင်း ဒေါက်တာအောင်ကျော်မိုးက ဆက်ပြောသည်။
ရခိုင်ပြည်နယ်တွင် ယနေ့အထိ ကိုဗစ်အတည်ပြုလူနာ ၁၁ဝဝ ခန့်ရှိလာနေပြီး သေဆုံးသူ၂၉ ဦးရှိလာပြီဖြစ်ကြောင်း ကျန်းမာရေးဌာနမှ ကောက်ယူထားသည့် စာရင်းများအရသိရသည်။
https://www.facebook.com/narinjara.info/posts/4499250870086955