By Development Media Group (DMG)/ 2021 May 26
ဘင်္ဂလားပင်လယ်အော် အရှေ့အလယ်ပိုင်းတွင် ဖြစ်ပေါ်နေသည့် ဆိုင်ကလုန်းမုန်တိုင်း ယာစ် YYAS ကြောင့် ရခိုင်ပြည်၊ မြောက်ဦးမြို့နယ်မှ စစ်ဘေးရှောင်စခန်းများတွင် တဲအိမ်အများအပြားပျက်စီးသွားခဲ့ကြောင်း စခန်းတာဝန်ရှိသူများထံမှ သိရသည်။
တဲအိမ် ၇၈၀ လုံးရှိသည့် မြောက်ဦးမြို့နယ် စင်းဘောကိုင်းစစ်ဘေးရှောင်စခန်းတွင် ပြင်းထန်သည့် လေပြင်းမုန်တိုင်းကြောင့် တဲအိမ် ၁၇၁ လုံး ပျက်စီးသွားသည်ဟု မြတန်ဆောင်းဆရာတော်မှ DMG ကို မိန့်ကြားသည်။
“ အဲဒီအိမ်တွေက ဆောက်လုပ်ထားတာတွေလည်းကြာပြီဆိုတော့ ပြန်လုပ်ရမဲ့ အခြေနေရှိနေပြီ။ ဒါပေမဲ့ ငွေကြေးအခက်အခဲတွေကြောင့် မဆောက်လုပ်နိုင်ခဲ့ဘူး။ အခု လေပြင်းတိုက်လာတော့ အိမ်ခေါင်မိုးပွင့်သွားတဲ့ အိမ်၊ ကျိုးကျသွားတဲ့အိမ်၊ အမိုးအကာတွေ ပျက်သွားတာ အကုန်လုံး ၁၇၁ လုံး ပါသွားတယ်။ မုန်တိုင်းက မပြီးသေးဘူးဆိုတော့ ကျန်တဲ့ နေအိမ်တွေအတွက်လည်း အလွန်စိုးရိမ်ရတဲ့ အခြေနေမှာရှိပါတယ်။ ” ဟု ဆိုသည်။
ပြိုပျက်သွားသည့် တဲအိမ် ၁၇၁ လုံးမှ လူဦးရေ ၇၈၀ မှာ နီးစပ်ရာတဲအိမ်များတွင် အသီးသီးနေထိုင်ကြပြီး ၎င်းတို့ကို ပြန်လည်ဆောက်လုပ်ရန်အတွက် ငွေကြေးအကူအညီလိုအပ်ကြောင်း ဆရာတော်က မိန့်သည်။
ယင်းတဲအိမ်များမှာ ခိုင်မာသည့်သစ်ဝါးများဖြင့် ဆောက်လုပ်ထားခြင်းမဟုတ်ဘဲ ကွမ်းသီးတိုင်၊ ဝါးတိုင်များဖြင့် ယာယီအဖြစ် ဆောက်လုပ်ထားခြင်းမှာ ၃ နှစ်ခန့် ကြာမြင့်နေပြီဖြစ်ကြောင်း ဦးစိုးသိန်းက DMG ကို ပြောသည်။
“ကျနော်တို့မှာ နေအိမ် တိုင်တွေကျိုးသွားတယ်။ အခုလောလောဆည်တော့ သူများအိမ်မှာ ကပ်နေရတယ်။ မိုးလည်း အခုချိန်ထိ ရွာနေတုန်းပါ။ မိသားစုတစ်စုတောင် နေလို့မရတဲ့နေအိမ်မှာ တခြားသူတွေပါ နေနေရတယ်ဆိုတော့ ပိုပြီးတော့ ကြပ်တည်းသွားတာပေါ့နော်။ မုန်တိုင်းက မပြီးသေးတော့ ထပ်ပြီးတော့ ပျက်စီးလာမယ်ဆိုတာ သေချာပါတယ်” ဟု ဆိုသည်။
၎င်းပြင် ယမန်နေ့မှ ဖြစ်ပေါ်ခဲ့သည့် မုန်တိုင်းအချိန်ကြောင့် မြတန်ဆောင်းစစ်ဘေးရှောင်စခန်းမှ တဲအိမ် ၁၃ လုံးနှင့် ကမ်းထောင်ကြီးစစ်ဘေးရှောင်စခန်းမှ တဲအိမ် ၆ လုံး ပျက်စီးသွားကြောင်း စခန်းတာဝန်ရှိသူများထံမှ သိရသည်။
စစ်ဘေးရှောင်များအနေဖြင့် ၎င်းနေအိမ်များကို ပြန်လည်တည်ဆောက်နိုင်ရန်အတွက် နိုင်ငံတကာအဖွဲ့အစည်းများ၊ အရပ်ဖက်အဖွဲ့အစည်းများနှင့် သက်ဆိုင်ရာဌာနအနေဖြင့် ငွေကြေးအကူညီများ ထောက်ပံ့ပေးရန် လိုအပ်နေသည်။
အားကောင်းလွန်းသော ဆိုင်ကလုန်းမုန်တိုင်း ယာစ် (YYAS) ၏ အချိန်ကြောင့် ယနေ့ နံနက်မှ နောက် (၄၈) နာရီအတွင်း ပဲခူးတိုင်း၊ ရန်ကုန်တိုင်း၊ ဧရာဝတီတိုင်းနှင့် ရခိုင်ပြည်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး၊ နေရာကွက်၍ မိုးကြီးနိုင်သည်ဟု ယနေ့နံနက် ၁၀ နာရီအချိန်က မိုးလေဝသနှင့် ဇလဗေဒ ညွန်ကြားမှုဦးစီးဌာနမှ ထုတ်ပြန်ထားသည်။
https://www.facebook.com/dmgnewsagency/posts/2023141641171570