By RFA/ 2021 May 28
ချင်းပြည်နယ် ပလက်ဝမြို့ပေါ် မြို့မရပ်ကွက်မှာ မြို့နယ်စီမံအုပ်ချုပ်ရေးကောင်စီရုံးနဲ့ မြန်မာ့စီးပွားရေးဘဏ် ရှေ့မှာ ဒီနေ့မနက် ၇ နာရီခွဲကျော်က ဗုံးနှစ်လုံး ပေါက်ကွဲခဲ့ပြီး ဈေးဝယ်လို့ပြန်လာတဲ့ အရပ်သား တစ်ဦး ရှပ်ထိဒဏ်ရာရသွားခဲ့တယ်လို့ ပလက်ဝမြို့ခံ ကိုတင်ထွန်းအောင်က RFA ကို ပြောပါတယ်။
အဲဒီဗုံးပေါက်ကွဲတဲ့နေရာအနီး စီးပွားရေးဘဏ်အနောက် မူကြိုကျောင်းနဲ့ ကောင်စီရုံးတွေမှာ အစကတည်းက စစ်ကောင်စီတပ်တွေ နေရာယူထားတာဖြစ်ပြီး အဲဒီနေရာအနီးအနားမှာ ပေါက်ကွဲတာဖြစ်တယ်လို့လည်း ဆိုပါတယ်။
အခုလက်ရှိတော့ ဗုံးပေါက်ကွဲတဲ့နေရာတွေကို စစ်ကောင်စီတပ်တွေက မိုင်းရှင်းရေးတွေ လုပ်ဆောင်နေပြီး လုံခြုံရေးတွေလည်း တင်းတင်းကျပ်ကျပ် ချထားတာကို တွေ့ရတယ်လို့လည်း ကိုတင်ထွန်းအောင်က ပြောပါတယ်။
အဲဒီဗုံးပေါက်ကွဲမှုဟာ ဘယ်အဖွဲ့ကလုပ်တာလဲ၊ ဘာကြောင့်လုပ်တာလဲ ဆိုတာကိုတော့ မသိရဘူးလို့လည်း သူကဆိုပါတယ်။
ဒီပေါက်ကွဲမှုဟာ တပ်မတော်အာဏာသိမ်းပြီးနောက် ပလက်ဝမြို့ပေါ်မှာ ပထမဆုံး ပေါက်ကွဲမှုလည်း ဖြစ်ပါတယ်။
https://www.rfa.org/burmese/news/paletwa-bomb-blast-05282021031054.html