By Developement Media Group (DMG)/ 2021 April 29
၈၈ ခေါင်းဆောင် ဦးမင်းကိုနိုင်အပါအဝင် အမှုဖွင့်ခံထားရသူ ၁၇ ဦးကို တွေ့ရှိက အကြောင်းကြားပေးရန် ရခိုင်ပြည်နယ်အတွင်းက ကျောက်ဖြူ၊တောင်ကုတ်၊အမ်းမြို့နယ်များ၌ လူအသွားအလာ များသည့် နေရာများတွင် ဆိုင်းဘုတ်စိုက်ထူ ကြေငြာထားကြောင်း ဒေသခံများထံမှ သိရသည်။
အဆိုပါဆိုင်းဘုတ်များကို ယခုရက်ပိုင်းအတွင်းက စိုက်ထူလာခြင်းဖြစ်ပြီး ကျောက်ဖြူမြို့တွင် စျေးကြီး၊ နာရီစင်၊ ကမ်းနားလမ်းတို့၌ စိုက်ထူထားပြီး တောင်ကုတ်တွင် မြို့မရဲစခန်းအနီး၊ အမ်းမြို့တွင် မြို့ဟောင်းလေးခွဆုံနေရာများ၌ စိုက်ထူထားခြင်းဖြစ်သည်။
“ အထင်ကရပုဂ္ဂိုလ်တွေကို ဖမ်းဆီးမယ်ဆိုရင် သာမန်လူတွေကို အချိန်မရွေးဖမ်းဆီးလို့ရတယ်ဆိုတဲ့ ခြိမ်းခြောက်မှုတစ်ခုဖြစ်တယ်။ ဒေသခံတွေကို ကြောက်လန့်အောင်လုပ်ဆောင်ချက်တစ်ခုဖြစ်တယ်။နောက် ပုံနဲ့တကွပြထားတော့ ပိုပြီးကြောက်အောင် လုပ်ထားတာလို့မြင်တယ် ” ဟု အမ်းမြို့ ဒေသခံ ကိုမျိုးလွင်က ပြောသည်။
မြို့နယ်တချို့၌ စိုက်ထူထားသည့် ဆိုင်းဘုတ်များတွင် ဦးမင်းကိုနိုင်၊ဦးဇော်ဝေစိုး၊ဦးဝင်းနိုင်၊ ဦးနိုင်ထူးအောင်၊ ဦးမျိုးနိုင်၊ ဒေါ်မြတ်သီတာထွန်း၊ ဦးနေမျိုး(ခ)ဦးဝင်း(ခ)ဦးမြင့်ဦး၊ ဦးဥက္ကာမင်း၊ စောယှားဖောင်းအွာ၊ ဦးဇေလက်၊ ဒေါ်ဖြူဖြူသင်း၊ ဦးထွန်းမြင့်၊ကိုဝေဖြိုးအောင်၊ ဒေါ်ဇင်မာအောင်၊ဦးလွင်ကိုလတ်၊ ဦးဇော်မင်းသိန်း၊ ဦးရည်မွန်(ခ) မောင်တင်သစ်တို့၏ အမည်များကို ပုံနှင့်တတွဖော်ပြထား၍ ကြေငြာထားခြင်းဖြစ်သည်။
အဆိုပါလူပုဂ္ဂိုလ်များမှာ ပုဒ်မ ၅၀၅ (က)နှင့် ပုဒ်မ ၁၂၂ တို့ဖြင့် အမှုဖွင့်အရေးယူထားသည့် တရားခံပြေး များဖြစ်ကြောင်း၊ ၎င်းတို့အား ဝိုင်းဝန်းဖမ်းဆီးပေးနိုင်ရန်နှင့် တွေ့ရှိပါက နီးစပ်ရာနယ်မြေခံ တပ်၊ရဲစခန်းသို့ အကြောင်းကြားပေးရန် ဆိုင်းဘုတ်ကြေငြာချက်တွင် ရေးသားထားသည်။ ယင်းအပြင် တရားခံပြေးများအား လက်ခံထားသူများကို ဥပဒေနှင့်အညီ ထိရောက်စွာ အရေးယူသွားမည်ဖြစ်ကြောင်းလည်း ပါရှိသည်။
“ ဒါက နိုင်ငံရေးအရ အားပြိုင်မှုဖြစ်တယ်။ CRPH ကို အားပေးတဲ့လူတွေနဲ့ လက်ရှိစစ်ကောင်စီနဲ့ အားပြိုင်တာ ဖြစ်တယ်။ဒါက အသုံးချမှုတွေပါလာတယ်။မြန်မာနိုင်ငံလုံးထက်စာရင် ရခိုင်ပြည်နယ်ဟာ စစ်ကောင်စီကို ဝေဖန်တယ်။ ပြင်းထန်စွာရှုံချတာတွေက သိပ်မရှိဘူး။ ရှိတော့ရှိတယ်။ အများကြီးမရှိဘူး။ ဒီလိုနေရာတွေကို အခုလို ဆိုင်းဘုတ်တွေနဲ့ကြေငြာတာဟာ နိုင်ငံရေးအရ အသုံးချတာလို့မြင်တယ်” ဟု ရခိုင်အရပ်ဘက်အဖွဲ့များ ကွန်ရက် (CAN) မှ BOD ဒါရိုက်တာ ဦးသန်းလှက ပြောသည်။
၈၈ မျိုးဆက်ကျောင်းသားခေါင်းဆောင်တစ်ဦးဖြစ်သည့် ကိုမင်းကိုနိုင်အပါအဝင် ၁၇ ဦးတို့ကိုတရားစွဲပြီး ဖမ်းဝရမ်းထုတ်ထားကြောင်း မြန်မာနိုင်ငံရဲတပ်ဖွဲ့က ဖေဖော်ဝါရီလ ၁၃ ရက်နေ့တွင် သတင်းထုတ်ပြန်ခဲ့သည်။
၎င်းတို့သည် နိုင်ငံတော်တည်ငြိမ်ဝပ်ပိပြားရေးကို ထိခိုက်စေသည့် ရေးသားချက်များ၊ပြောဆိုချက်များကို ဆိုရှယ်မီဒီယာများ၊လူမှုကွန်ရက်များကို အသုံးပြုလုပ်ဆောင်နေသည်ကို တွေ့ရှိရသည်ဟုဆိုကာ တရားစွဲထားခြင်း ဖြစ်ကြောင်း ရဲတပ်ဖွဲ့က ထုတ်ပြန်ထားသည်။
https://www.facebook.com/dmgnewsagency/posts/2001430860009315