ရန်ကုန်မှ ပြန်လာသည့် ရခိုင်များကို အလုပ်ရရန် ပြည်နယ်ကောင်စီ စီစဉ်နေ

By Development Media Group (DMG) / 2021 March 20

ရန်ကုန်မှ ရခိုင်ပြည်နယ်၊ ဇာတိနေရပ်သို့ ပြန်ရောက်လာသူများကို သက်ဆိုင်ရာ မြို့နယ်အလိုက် သင့်တော်သည့်လုပ်ငန်းများ ဆောင်ရွက်ပေးရန် စီစဉ်နေကြောင်း ရခိုင်ပြည်နယ်စီမံအုပ်ချုပ်ရေးကောင်စီအဖွဲ့ဝင် ဗိုလ်မှူးကြီး မင်းသန်းက DMG သို့ ပြောသည်။

“ ရခိုင်ကိုပြန်လာပြီးတော့ အလုပ်လက်မဲ့ဖြစ်နေတဲ့သူတွေကို စိုက်ပျိုးရေးနဲ့ ဆိုင်တဲ့သူတွေဆိုရင် စိုက်ပျိုးရေးနဲ့ ပတ်သက်ပြီးတော့ လုပ်လို့ရတဲ့အလုပ်တွေရှိတယ်။ မွေးမြူးရေးနဲ့ဆိုရင်လည်း မွေးမြူးရေးနဲ့ပတ်သက်ပြီးတော့ အခြေနေတွေ ဆောင်ရွက်သွားဖို့ အစီစဉ်တော့ရှိတယ်။ အသေးစိတ်တော့ မရနိုင်သေးဘူး”ဟု ဆိုသည်။

ရန်ကုန်မှ ရခိုင်သို့ ပြန်လာနိုင်ရန် ကောင်စီအနေဖြင့် ဆောင်ရွက်ပေးနေကြောင်း ဗိုလ်မှူးကြီး မင်းသန်းက ဆက်ပြောခဲ့သည်။

ရန်ကုန်မှ ရခိုင်သို့ပြန်ရောက်နေသည့် မင်းပြားမြို့နယ်၊ ရေနံချိန်ကျေးရွာမှ မစိုးမိုးကြည်က “ အခုက ရခိုင်မှာ အလုပ်မရှိဘူးဆိုတော့ စားဝတ်နေရေးကအစ အခက်ခဲတွေရှိတယ်။ ရခိုင်ကို ဘာကြောင့် ပြန်လာရတဲ့ဆိုတော့ ရန်ကုန်မှာ ဆူနေတဲ့အတွက် စက်ရုံတွေပိတ်ထားလို့ ပြန်လာရတာ”ဟု ဆိုသည်။

ရန်ကုန်မှ မိမိတို့နေရပ်အသီးသီးသို့ ပြန်လာကြသူများမှာ အလုပ်လက်မဲ့ဖြစ်နေကြသည့်အတွက် လက်ရှိကောင်စီအနေဖြင့် အလုပ်အကိုင်များ ဖန်တီးပေးစေလိုကြောင်းလည်း ကျောက်တော်မြို့မှ မမြတ်အေးခိုင်က ပြောသည်။

“ အခုက ရခိုင်ကိုပြန်လာတော့ အလုပ်မရှိတော့ဘူး၊ အလုပ်လက်မဲ့ဖြစ်နေတယ်။ အလုပ်မရှိတော့ မိသားစုစား ဝတ်နေရေးတွေ အခက်ခဲဖြစ်နေတယ်။ အခုလက်ရှိအစိုးရအနေနဲ့ ရန်ကုန်က ပြန်လာတဲ့အလုပ်လက်မဲ့ ဖြစ်နေသူတွေကို အလုပ်ပေးစေချင်တယ်။ အခုက အလုပ်မရှိတော့ ဝင်ငွေဆိုတာလည်းမရှိဘူး”ဟု ၎င်းကဆိုသည်။

ကိုဗစ်ကာလမှစတင်ကာ စက်ရုံအလုပ်ရုံများရပ်နားမှုများကြောင့် ရန်ကုန်ရောက် ရခိုင်အချို့ ရခိုင်ပြည်နယ်သို့ ပြန်လာမှုများရှိခဲ့ပြီး ဖေဖော်ဝါရီလမှ စတင်ကာ လက်ရှိအချိန်အထိ ရခိုင်ပြည်နယ်သို့ ပြန်လာသူဦးရေ နှစ်ထောင်ကျော်ခန့် ရှိပြီဖြစ်ကြောင်း ရခိုင်လူမှုကူညီရေးအသင်း (ရန်ကုန်) မှ ကိုမင်းသုတက ပြောသည်။

https://www.facebook.com/dmgnewsagency/posts/1970481349770933

Leave a Reply

Your email address will not be published.