By Irrawaddy/ 2021 March 6
ရခိုင်ပြည်နယ်၊ မောင်တောမြို့နယ်အတွင်း မတ်လ ၅ ရက်နေ့ မွန်းလွဲပိုင်းတွင် အကြမ်းဖက်အဖွဲ့ဟု ကြေညာထားသည့် အာရကန် ရိုဟင်ဂျာကယ်တင်ရေးတပ် (ARSA) က နယ်စပ်ခြံစည်းရိုး ကာရံရန် ပစ္စည်းများ တင်ဆောင်နေသည့် ကားတစီးအား တိုက်ခိုက်သည့်အတွက် ဒုအရာခံ ဗိုလ် ၁ ဦး အပါအဝင် ၃ ဦး သေဆုံးသွားခဲ့ကြောင်း သိရသည်။
ဖြစ်စဉ်မှာ နယ်စပ် မိုင်တိုင်အမှတ် ၄၅ အနီးတွင် ခြံစည်းရိုးကာရံနေကြသည့် အမှတ် ၉၄၂ ဆောက်လုပ်ရေး အင်ဂျင်နီယာ တပ်ရင်းမှ ဒုအရာခံဗိုလ် သက်ထွန်းအောင်နှင့် အရပ်သား အလုပ်သားများဖြစ်သည့် ကိုဌေးဝင်း၊ ကိုစံရန်းတို့ ၃ ဦးသည် အနီးဝန်းကျင်ရှိ အောင်ဇံကျေးရွာသို့ သဲယူရန် ကားဖြင့် သွားရောက်စဉ် တိုက်ခိုက်ခံရခြင်း ဖြစ်ကြောင်း ဒေသအာဏာပိုင် များက ပြောသည်။
မောင်တောခရိုင် စီမံခန့်ခွဲရေးအဖွဲ့ ဥက္ကဋ္ဌ ဦးစိုးအောင်က “သူတို့ မိုင်တိုင် ၄၅ အနီးမှာ ခြံစည်းရိုးကာနေတာ။ အဲဒီမှာ သဲ ကုန်သွားတော့ ကားနဲ့ သဲသွားတိုက်တဲ့အချိန် မိုင်တိုင် ၄၅ နဲ့ အောင်ဇံရွာကြားမှာ ကားကို ဝိုင်းပစ်တာ။ အရာခံဗိုလ် ၁ ဦး အပါအဝင် ၃ ဦး သေဆုံးတယ်။ အဲဒီဘက်မှာ AA လှုပ်ရှားတာလည်း မရှိဘူး။ အရင်ကတည်းက ARSA လှုပ်ရှားတဲ့နေရာ ဆိုတော့ ARSA လုပ်တါပဲ ဖြစ်ပါမယ်” ဟု ဧရာဝတီကို ပြောသည်။
ထိုသို့ တိုက်ခိုက်ပစ်ခတ် ခံရမှုကြောင့် ၎င်းတို့ ၃ ဦးလုံး အခင်းဖြစ်နေရာ၌ပင် သေဆုံးသွားခဲ့ပြီး လုံခြုံရေးတပ်ဖွဲ့ဝင်များက ယမန်နေ့ကတည်းက လိုက်လံကာ နယ်မြေရှင်းလင်းရေး လုပ်ဆောက်လျက် ရှိကြောင်း၊ သေဆုံးသွားသူ အလုပ် သမား ကိုဌေးဝင်း (၁၈ နှစ်) သည် မောင်တောမြို့နယ် ကိုင်းကြီးကျေးရွာမှဖြစ်ပြီး ကိုစံရန်း (၁၇ နှစ်) သည် ဘောင်းကျေးရွာ မှဖြစ်ကာ နှစ်ဦးစလုံး မြိုတိုင်းရင်းသားများ ဖြစ်ကြောင်း သိရသည်။
အာရကန် ရိုဟင်ဂျာ ကယ်တင်ရေးတပ်ဟု အမည်ပေးထား သော ARSA အဖွဲ့ဝင်များသည် မောင်တောမြို့နယ်အတွင်း ရှိ ခမောင်းဆိပ်၊ ဝေလာတောင်နှင့် တမန်းသားအထက်တို့တွင် ဝင်ရောက်လှုပ်ရှားလေ့ရှိပြီး မေယုတောင်ကြော၌လည်း သင် တန်းများဖွင့်ကာ တပ်ဖွဲ့ဝင်များ စုဆောင်ခြင်း၊ တချို့ မွတ်စလင် ကျေးရွာများသို့ ဝင်ရောက်ကာ အဓမ္မ ဆက်ကြေး ကောက်ခံမှုများ ရှိကြောင်း ဒေသတွင်း သတင်းများ ထွက်ပေါ်လျက်ရှိသည်။
ပြီးခဲ့သည့် ၂၀၂၀ ဒီဇင်ဘာ ၉ ရက်တုန်းကလည်း မောင်တောမြို့နယ် မင်္ဂလာညွန့် ကျေးရွာသား ၁ ဦးမှာ ယင်းကျေးရွာ အနီး ဝေလာတောင် ကျေးရွာသို့ ဆိုင်ကယ်ဖြင့် သွားရောက်စဉ် ARSA အဖွဲ့နှင့်တွေ့၍ ထွက်ပြေးလာခဲ့ရပြီး ၎င်း၏ ဆိုင် ကယ်မှာ မီးရှို့ခံခဲ့ရကြောင်း ကျေးရွာအုပ်ချုပ်ရေးအဖွဲ့ဝင်များက ပြောသည်။
၂၀၂၀ နိုဝင်ဘာ ၁၇ ရက်နေ့ကလည်း မောင်တောမြို့ နယ် ခရေမြိုင် ကျေးရွာသားများသည် ယင်းမြို့နယ် အတွင်း ရှိ သာယာကုန်းကျေးရွာတွင် ပြုလုပ်သည့် ဘုံကထိန်ပွဲသို့ ကားဖြင့် သွားရောက်စဉ် ARSA အဖွဲ့၏ မိုင်းဆွဲ တိုက်ခိုက်မှု ကြောင့် ၃ ဦးသေဆုံးခဲ့ပြီး ၆ ဦး ထိခိုက်ဒဏ်ရာများ ရရှိခဲ့သည်။
ARSA အဖွဲ့သည် ၂၀၁၆ အောက်တိုဘာ ၉ ရက်နေ့တွင် အမှတ် ၁ နယ်ခြားစောင့်ဌာနချုပ် (ကျီးကန်းပြင်) နှင့် ကိုး တန်းကောက် ရဲစခန်း၊ ငါးခူရ ရဲစခန်းတို့ကို ဝင်ရောက် တိုက်ခိုက်ခဲ့သည့်အတွက် ရဲတပ်ဖွဲ့ဝင် ၉ ဦး ကျဆုံးခဲ့ပြီး လက်နက် မျိုးစုံ ၄၈ လက်နှင့် ကျည်မျိုးစုံ ၆၆၂၄ တောင့် ဆုံးရှုံးခဲ့ကြောင်း အစိုးရက အကြမ်းဖက်မှုဖြစ်စဉ် နောက်ပိုင်း သတင်း ထုတ် ပြန်ခဲ့သည်။
၂၀၁၇ သြဂုတ် ၂၅ ရက်နေ့ကလည်း ARSA အဖွဲ့သည် ကိုဖီအာနန် အကြံပေးကော်မရှင်၏ နောက်ဆုံး အစီရင်ခံစာ ထွက် ပေါ်လာသည်နှင့် တပြိုက်နက် နယ်ခြားစောင့်တပ်စခန်း ၃၀ ကို တပြိုင်တည်း တိုက်ခိုက်ခဲ့ပြီး နိုင်ငံတကာ၏ အာရုံစူးစိုက်မှု ကို အချိန်ကိုက် ရယူခဲ့သည်။
https://www.facebook.com/121507374560090/posts/4273982849312501/