By Development Media Group (DMG) / 2021 March 22
စစ်တပ်အာဏာရယူမှုကို ဆန့်ကျင်ဆန္ဒပြ၍ ဖမ်းဆီးထိန်းသိမ်းခံရသူများအား ချက်ချင်းပြန်လွှတ်ပေးရန် ရခိုင်အရပ်ဖက်အဖွဲ့အစည်း ၇၇ ခုမှ မနေ့က မတ်လ ၂၁ ရက်နေ့တွင် သဘောထားထုတ်ပြန် တောင်းဆိုလိုက်သည်။
၂၀၂၁ ခုနှစ်၊ ဖေဖော်ဝါရီလ (၁) ရက်နေ့မှ စတင်၍ တပ်မတော်မှ အာဏာရယူပြီး နိုင်ငံတော်စီမံအုပ် ချုပ်ရေးကောင်စီကို ဖွဲ့စည်းကာ အာဏာရယူမှုကို ကန့်ကွက်ဆန္ဒထုတ်ဖော်သော အရပ်သားပြည်သူများကို နည်းလမ်းမျိုးစုံ အသုံးပြုပြီး အင်အားအလွန်အကျွံသုံး ဖြိုခွင်းလျက်ရှိနေသည်။
မတ်လ ၂၁ ရက်နေ့အထိ အရပ်သားပြည်သူသေဆုံးသူ ဦးရေး ၂၄၇ ဦး၊ ဖမ်းဆီး၊ တရားစွဲဆို၊ ပြစ်ဒဏ်ချမှတ်ခြင်း ခံထားရသူဦးရေ ၂၃၄၅ ဦးအထိ ရှိလာသည်ဟု AAPP အဖွဲ့မှ ထုတ်ပြန်ထားသည်။
“ အဓိက ဒီ Statement ထုတ်ပြန်ချက်ပါဝင်ရတဲ့ အကြောင်းရင်းကတော့ အာဏာသိမ်းပြီးတော့ နောက်ပိုင်း အခု လက်တလောနိုင်ငံအတွင်းမှာ ဖြစ်ပေါ်နေတဲ့ နေရာတွေမှာ သေဆုံးများလာတဲ့အတွက် စိတ်မကောင်းဖြစ်ရတယ်။ ဖက်ဒရယ်ဒီမိုကရေစီကို အမှန်လိုလားတယ်ဆိုရင် ဘယ်အစိုးရတက်တက် မဟုတ်ရင်မဟုတ်တဲ့အကြောင်းကို ကျွန်မတို့က ကန့်ကွက်ရမှာပဲ။ ဆန္ဒပြတဲ့သူတွေကိုလည်း ဖမ်းတာတွေ လွန်ကျူးလာတာတွေကို မြင်တွေ့ရတယ်။ ဒီဖမ်းဆီးထားတဲ့သူတွေကို အမြန်ဆုံးပြန်လွှတ်စေချင်တယ်။ ” ဟု ရခိုင်အမျိုးသမီးများကွန်ယက် ဥက္ကဌ ဒေါ်ညိုအေးက DMG သို့ ပြောသည်။
ထိုအပြင် လက်နက်မဲ့ပြည်သူများအပေါ် အင်အားအလွန်အကျွံသုံး နှိမ်နင်းဖြိုခွင်းသည့်လုပ်ရပ်များကို လုံးဝအဆုံးသတ်ပေးရန် တောင်းဆိုထားသည်။
ရခိုင်လူ့အခွင့်ရေးကာကွယ်မြှင့်တင်သူများအဖွဲ့ အမှုဆောင်ဒါရိုက်တာ ဦးမြတ်ထွန်းက “ ငြိမ်းချမ်းစွာ ဆန္ဒပြနေတဲ့ လက်နက်မဲ့ပြည်သူတွေကို အာဏာသိမ်းအစိုးရက မျက်ရည်ယိုဗုံးတွေနဲ့ပစ်တယ်၊ ရော်ဘာကျည်ဆန်တွေ ပစ်တယ်၊ နောက်ပြီးတော့ ကျည်အစစ်တွေပစ်တယ် အတွက်ကြောင့် သေဆုံးမှုတွေရှိတယ်။ အဲဒါက အကြမ်းဖက်တာဖြစ်တဲ့ အတွက်ကြောင့် ကျနော်တို့ ရခိုင်လူ့အခွင့်ရေးအဖွဲ့နေပြီးတော့ မဖြစ်သင့်ဘူးလို့ ယူဆတယ်” ဟု ပြောသည်။
ထို့အပြင် ပြည်သူများလိုလားသော ကိုယ်ပိုင်ပြဠာန်းအုပ်ချုပ်ခွင့်ကို အခြေခံသည့် ဖက်ဒရယ်ဒီမိုကရေစီစနစ်ကို အသိအမှတ်ပြုလက်ခံပြီး အာဏာသိမ်းမှုကို အမြန်ဆုံးစွန့်လွှတ်ပေးရန် ထိုထုတ်ပြန်ချက်တွင် တောင်းဆိုထား သည်။
၎င်းနည်းအတူ တပ်မတော်ဦးဆောင်သည့် နိုင်ငံတော်စီမံအုပ်ချုပ်ရေးကောင်စီနှင့် ပူးပေါင်းကာ အကျိုးအမြတ်ရှာဖွယ်နေသော ဖောက်ပြန်ရေးသမား အပေါင်းတို့သည်လည်း အလွန်တရာမှ စက်ဆုပ်ရွံရှာဖွယ် ကောင်းလှသော သတ္တဝါများဖြစ်ကြောင်း ရက္ခိုင့်ကျောင်သားသမဂ္ဂအဖွဲ့ ၁၁ ဖွဲ့မှ မတ်လ ၂၁ ရက်နေ့က ထုတ်ပြန်ထားသည်။
https://www.facebook.com/dmgnewsagency/posts/1972350489584019