By Irrawaddy/ 2021 January 7
ခိုင်ရိုးလ
ရခိုင်ပြည်နယ်အတွင်း အများဆုံးအနိုင်ရသည့် ရခိုင်အမျိုးသားပါတီ (ANP)ကို အစိုးရဖွဲ့ခွင့်ပေးရန် ရခိုင် တိုင်းရင်းသား မျိုးနွယ်စုများဖြစ်သော မြို၊ ခမီ၊ ဒိုင်းနက်၊ မရမာ၊ ကမန် စသည့် လူမျိုးစု ခေါင်းဆောင်များက ယနေ့ တောင်းဆို လိုက် သည်။
ယနေ့ စစ်တွေမြို့ ရှိ ANP ပါတီဗဟိုရုံး၌ ပြုလုပ်သည့် “လက်ရှိ ရခိုင်နိုင်ငံရေး ပြဿနာများကို ဝိုင်းဝန်း အဖြေရှာရေး” ရခိုင်အမျိုးသားပါတီ(ANP)နှင့် ရခိုင်ပြည်နယ်တွင်းရှိ တခြားသော တိုင်းရင်းသား မျိုးနွယ်စုပါတီများမှ တာဝန်ရှိသူများ အပါအဝင် မျိုးနွယ်စု ကိုယ်စားလှယ်များ တွေ့ဆုံဆွေးနွေးရာမှ ထိုသို့ တောင်းဆိုချက် ထွက်ပေါ်လာခြင်း ဖြစ်သည်။
ANP ပါတီနှင့် ရခိုင်မျိုးနွယ်စု တိုင်းရင်းသား နိုင်ငံရေးပါတီများ တွေ့ဆုံရန် ပေါင်းစည်းညှိနှိုင်းရေး ဦးဆောင်ကော်မတီ ပြောရေးဆိုခွင့်ရှိသူ ဦးရွှေဘော်စိန်က “ရခိုင်မှာရှိတဲ့ အနိုင်ရပါတီကတော့ အစိုးရဖွဲ့ခွင့် ရသင့်တယ်။ ဒါပေမယ့် ဥပဒေ အရတော့ မရဘူးပေါ့။ ဒါတွေကိုတော့ ဘယ်လို လုပ်ရမယ်ဆိုတာတော့ စဉ်းစားရမယ်။ ရခိုင်ပြည်နယ်မှာ အားလုံးကို ကိုယ်စားပြုတဲ့ အနိုင်ရတဲ့ ပါတီကပဲ အစိုးရဖွဲ့ခွင့် ရသင့်တယ်။ ANP ပါတီက ရခိုင်မှာ အစိုးရဖွဲ့နိုင်တဲ့ အခြေအနေ ရှိ ပေမယ့် လက်ရှိ ဥပဒေအရဆိုရင် ANP က အစိုးရမဖွဲ့နိုင်တဲ့ အနေအထားမှာရှိတယ်” ဟု သတင်းထောက်များကို ပြော ဆိုသည်။
ရခိုင်ပြည်နယ်၏ အနာဂတ် တည်ငြိမ်အေးချမ်းရေးနှင့် ဖွံ့ဖြိုးရေးကို ရခိုင်နှင့် အတူနေတိုင်းရင်းသားမျိုးနွယ်စုများ၏ အခန်းကဏ္ဍမှာ အရေးကြီးသည့် အတွက် နှစ်ဘက်အသိုင်းအဝိုင်းကြားတွင် ယုံကြည်မှု၊ အပြန်အလှန် နားလည်မှု တည်ဆောက်ရန် လိုအပ်သလို လက်ရှိပဋိပက္ခများအား အပြုသဘောဆောင်သည့် တွေ့ဆုံမှုများ လိုအပ်သည့် အတွက် ရခိုင်အင်အားကြီးပါတီနှင့် လာရောက် တွေ့ဆုံရခြင်းဖြစ်ကြောင်းလည်း ဦးရွှေဘော်စိန်က ဆိုသည်။
ဦးရွှေဘော်စိန်မှာ ယနေ့ ANP နှင့်တွေ့ဆုံခဲ့သည့် ရခိုင် မျိုးနွယ်စုပါတီများဖြစ်ကြသည့် ကမန်အမျိုးသား တိုးတက်ရေး ပါတီ၊ ခမီအမျိုးသားပါတီ၊ ခမီ ဖွံ့ဖြိုးတိုးတက်ရေးပါတီ၊ မြိုတိုင်းရင်းသားပါတီ၊ ဒိုင်းနက်လူမျိုးများတိုးတက်ရေးပါတီ၊ မြိုတိုင်းရင်းသား ဖွံ့ဖြိုးရေးပါတီများ အားလုံး၏ ပြောရေးဆိုခွင့်ရှိသူလည်းဖြစ်သည်။
ယနေ့ တွေ့ဆုံပွဲတွင် ရခိုင်တိုင်းရင်းသားမျိုးနွယ်စုများဘက်မှ တာဝန်ရှိသူတို့က ၎င်းတို့၏ ရပိုင်ခွင့်အရေးများ၊ အခက် အခဲနှင့် စိန်ခေါ်မှုများ ဒေသဖွံ့ဖြိုးတိုးတက်မှု စသည့် အခြားအကြောင်းအရာတွေကို ဆွေးနွေးခဲ့ကြပြီး ရခိုင်ပါတီမှ အစိုးရ ဖွဲ့ခွင့် ရပါက ရခိုင်တိုင်းရင်းသားမျိုးနွယ်စုများမှာ ယခုထက် ဖွံ့ဖြိုးတိုးတက်မှုအများအပြား ရရှိနိုင်ကြောင်း ယုံကြည်နေကြခြင်းဖြစ်သည်။
ကမန်လူမျိုးစု ကိုယ်စားပြုခေါင်းဆောင် ဒေါ်ခင်မျိုးညွန့်က “ရခိုင်ပြည်နယ်မှာ ရခိုင်အမျိုးသားပါတီကပဲ အစိုးရ ဖွဲ့ခွင့် ရချင်တယ်။ ဘာဖြစ်လို့လဲဆိုတော့ ကျမတို့က ရခိုင်တိုင်းရင်းသားမျိုးနွယ်စု တွေပဲလေ။ ဒါကြောင့် ကျမတို့ရဲ့ ရပိုင်ခွင့် တွေကို ရခိုင်ပါတီကပဲ အစိုးရ ဖွဲ့စည်းခွင့်ရရင် ပိုကောင်းတာပေါ့။ အစိုးရဖွဲ့ခွင့်ရရင် ကျမတို့ တိုင်းရင်းသားကျေးရွာ တွေ မှာ လမ်းပန်းဆက်သွယ်ရေး စတဲ့ တိုင်းရင်းသားအရေးတွေကို ဒီထက်လုပ်နိုင်လိမ့်မယ်လို့ ထင်တယ်” ဟု ဆိုသည်။
ထို့အတူ မြန်မာနိုင်ငံတွင် အမျိုးသားဒီမိုကရေစီအဖွဲ့ချုပ်ပါတီ NLD က အနိုင်ရရှိသည့်အတွက် ပြည်ထောင်စု အစိုးရ ဖွဲ့ခွင့်ရသလို ပြည်နယ်များတွင်လည်း အနိုင်ရထားပြီး ပြည်သူအများအပြားထောက်ခံသည့် ရခိုင်ပါတီကို အစိုးရဖွဲ့ခွင့် ပေးသင့်ကြောင်း လည်း မရမာကြီးတိုင်းရင်းသားများကလည်း ဆိုသည်။
ယနေ့ ဆွေးနွေးပွဲတွင် ပါဝင်ခဲ့သည့် မရမာကြီး တိုင်းရင်းသား လူမျိုးစုခေါင်းဆောင် ဦးမောင်နုက “ရခိုင်ပြည်နယ်မှာ ရခိုင်အမျိုးသားပါတီက မဲအများဆုံးဖြစ်တဲ့အတွက် ရခိုင်အမျိုးသားပါတီကို အစိုးရဖွဲ့ခွင့်ပေးပါ။ ဒါက ရခိုင်တိုင်းရင်းသား မျိုးနွယ်စုတွေရဲ့ ဒုက္ခကို သိတယ်။ ကျနော်တို့က ရခိုင်အမျိုးသားပါတီရဲ့ မူဝါဒလမ်းစဉ် အတိုင်းသွားမယ်။ ကျနော်တို့က တိုင်းရင်းသားမျိုးနွယ်စု ၇ မျိုးဟာ အားလုံး ညီအစ်ကိုတွေပဲ ” ဟု တောင်းဆိုသည်။
ယင်းသို့ ရခိုင်မျိုးနွယ်စုများနှင့် တွေ့ဆုံရန် ရခိုင်အမျိုးသားပါတီ ဖွဲ့စည်းပုံတွင် မူဝါဒချမှတ်ထားပြီးဖြစ်သလို လက်ရှိ မျိုးနွယ်စုများ ခံစားနေရသည့် ဒုက္ခများကို နိုင်ငံရေးအရ ဝိုင်းဝန်းအဖြေရှာရန် ယင်းသို့ ဆွေးနွေးရခြင်းဖြစ်ကြောင်း ရခိုင်အမျိုးသားပါတီ တာဝန်ရှိသူက ဆိုသည်။
ယင်းအပြင် အမျိုးသားဒီမိုကရေစီ အဖွဲ့ချုပ်ပါတီ အနေဖြင့် ရခိုင်ပြည်နယ်အရေးနှင့် ပတ်သက်၍ ANP ကို အစိုးရဖွဲ့ခွင့် ပေးလျှင် ပြည်နယ်အတွင်း ငြိမ်းချမ်းရေး၊ ဖွံ့ဖြိုးတိုးတက်မှုများကို လုပ်နိုင်ဟု ယုံကြည်ထားသည့်အတွက် အစိုးရဖွဲ့ခွင့် ရရှိရေး မျှော်လင့်နေသည်။
ရခိုင်အမျိုးသားပါတီ မူဝါဒရေးရာကော်မတီဝင်လည်းဖြစ် ယခုရွေးကောက်ပွဲ အနိုင်ရထားသည့် အမျိုးသားလွှတ်တော် ကိုယ်စားလှယ် ဦးထွန်းအောင်ကျော်က “ NLD က နိုင်ငံရေးအရ သဟဇာတကျအောင် ကျနော်တို့နဲ့ တွဲပြီးတော့ လုပ် မယ်လို့ အခြေအနေတွေပေးလာမယ် ဆိုရင် ကျနော်တို့ အမြင့်ဆုံးမျှော်လင့်ထားတဲ့ ကိုယ့် ရခိုင်ပြည်နယ်မှာ အစိုးရဖွဲ့ ပြီးတော့မှ ရခိုင်တပြည်နယ်လုံးရဲ့ ငြိမ်းချမ်းရေး တည်ငြိမ် ဖွံ့ဖြိုးတိုးတက်မှုကို ကျနော်တို့လုပ်နိုင်တယ်။ လုပ်နိုင်တဲ့သူ တွေလည်း ပါတီမှာ ရှိတယ်။ ဘေးက ဝန်းရံမယ့်သူတွေလည်း ရှိတယ်။ ဒါကြောင့် ကျနော်တို့ အစိုးရဖြစ်ချင်တယ်။ ဒါကျနော်တို့ နိုင်ငံရေးလမ်းပဲ ” ဟု ဆိုသည်။
ANP ပါတီသည် ပြီးခဲ့သည့် ၂၀၁၅ ရွေးကောက်ပွဲတွင် ရခိုင်ပြည်နယ်တခုလုံး အများဆုံးအနိုင်ရရှိခဲ့ပြီး ပြည်နယ် ဝန်ကြီးချုပ်အပါဝင် အစိုးရဦးဆောင်ဖွဲ့စည်းခွင့် မရရှိသောကြောင့် အတိုက်ခံပါတီအဖြစ်နှင့် နေခဲ့သည်။
ပြီးခဲ့သည့် ၂၀၂၀ ရွေးကောက်ပွဲ ANP သည် ရခိုင်ပြည်နယ်လွှတ်တော် စစ်တွေမြို့နယ်တွင် ၂ နေရာ၊ ရမ်းဗြဲမြို့နယ်တွင် ၂ နေရာ၊ မာန်အောင်မြို့နယ်တွင် ၂ နေရာနှင့် တောင်ကုတ်မြို့နယ်တွင် ၁ နေရာ စုစုပေါင်း ၇ နေရာတို့ ဖြစ်ကြပြီး ပြည်သူ့လွှတ်တော်နေရာတွင် စစ်တွေမြို့နယ်၊ တောင်ကုတ်မြို့နယ်၊ မာန်အောင်မြို့နယ်နှင့် ရမ်းဗြဲမြို့နယ် စုစုပေါင်း ၄ နေရာတို့ဖြစ်သလို အမျိုးသားလွှတ်တော်နေရာတွင် ကျောက်ဖြူနှင့် မာန်အောင် ၁ နေရာ၊ အမ်းနှင့် ရမ်းဗြဲ ၁ နေရာ၊ စစ်တွေ ၁ နေရာနှင့် တောင်ကုတ် ၁ နေရာ စုစုပေါင်း လွှတ်တော်နေရာ ၁၅ ခုတွင် အနိုင်ရရှိထားသည်။
ရခိုင်ပြည်နယ်တွင် ရခိုင်၊ ကမန်၊ ခမီ၊ ဒိုင်းနက်၊ မရာမာကြီး၊ မြို၊ သက်တိုင်းရင်းသား မျိုးစု ၇ မျိုးနေထိုင်ကြပြီး ယင်း အထဲတွင် မရမာကြီးနှင့် သက်လူမျိုးတို့သည် ရခိုင်ပြည်နယ်အတွင်း လူဦးရေ အနည်းငယ်သာရှိသဖြင့် နိုင်ငံရေးပါတီ ထူထားခြင်းမရှိသေးပေ။
သက်လူမျိုးတို့သည် ရခိုင်ပြည်နယ်အတွင်း မောင်တော၊ ရသေ့တောင်၊ ပုဏ္ဏားကျွန်း၊ ဘူးသီးတောင်၊ မြောက်ဦး စသည့် မြို့နယ်တို့ရှိ တောင်ပေါ်ဒေသတို့တွင် အများဆုံးနေထိုင်ကြပြီး လူဦးရေ ထောင်ဂဏန်းကျော် ခန့်သာရှိ ကြောင်းသိရသည်။
မရမာကြီးတိုင်းရင်းသားများကို စစ်တွေ၊ မောင်တော၊ မြောက်ဦး၊ ပုဏ္ဏားကျွန်း၊ ကျောက်ဖြူ ၊ မင်းပြား စသည့်မြို့နယ် တို့တွင် လူဦးရေ စုစုပေါင်း ၁ သောင်းခန့် နေထိုင်ကြောင်းသိရသည်။
ခမီ တိုင်းရင်းသားများသည် လူဦးရေ ၈ သောင်းကျော် ရှိပြီး ရခိုင်ပြည်နယ်မြောက်ပိုင်း ကျောက်တော်၊ ဘူးသီးတောင်၊ ပေါက်တော၊ ပုဏ္ဏားကျွန်း၊ မြောက်ဦးစသည့် မြို့နယ်ရှိ တောင်ပေါ်ဒေသနှင့် မြေပြန့်တို့တွင် နေထိုင်ကြသည်။
မြိုတိုင်းရင်းသားများမှာလည်း ရခိုင်ပြည်နယ်မြောက်ပိုင်း မောင်တော၊ ကျောက်တော်၊ ပုဏ္ဏားကျွန်း၊ ဘူးသီးတောင်၊ မြောက်ဦး စသည့်ဒေသတို့တွင်နေထိုင်ကြပြီး လူဦးရေ ၃ သောင်း ကျော်ရှိကြောင်းသိရသည်။
ဒိုင်းနက် တိုင်းရင်းသား လူမျိုးတို့မှာ ရခိုင်ပြည်နယ် မောင်တော၊ ပုဏ္ဏားကျွန်း၊ ကျောက်တော်၊ မြောက်ဦး စသည့်ဒေသ တောင်ပေါ်တို့တွင် နေထိုင်ကြပြီး လူဦးရေ သောင်းကျော် ရှိကြောင်း သိရသည်။
ယင်းသို့ ရခိုင်တိုင်းရင်းသားမျိုးနွယ်စုများထဲတွင် ခမီ၊ မြို၊ ဒိုင်းနက်၊ ကမန်တို့မှာ နိုင်ငံရေးပါတီ ထူထောင်ထားသော် လည်း ၂၀၂၀ ရွေးကောက်ပွဲတွင် ရွေးကောက်ပွဲကျင်းပနိုင်ခြင်းမရှိသည့် မြို့နယ်များတွင် ၎င်းတို့၏ မဲဆန္ဒနယ်များ ပါဝင်သွားသဖြင့် ရွေးကောက်ပွဲဝင်ခွင့် မရရှိခဲ့သလို ယခင် ၂၀၁၅ ရွေးကောက်ပွဲတွင်လည်း အနိုင်ရရှိခဲ့ခြင်းများ မရှိခဲ့ပေ။
https://www.facebook.com/121507374560090/posts/4096407860403335/