ရခိုင်စစ်ရှောင်များ နေရပ်ပြန်နိုင်ရေး ပြည်နယ်အစိုးရက နပခ တိုင်းမှူးထံ စာပို့

By Irrawaddy/ 2021 January 18

ခိုင်ရိုးလ

တပ်မတော်နှင့် ရက္ခိုင်စစ်တပ် (AA) တို့ အပစ်အခတ် ရပ်စဲနေသည့်အတွက် ရခိုင်စစ်ဘေးရှောင်များကို လုံခြုံစွာနေရပ်သို့ ပြန်နိုင်ရေး ပြည်နယ်အစိုးရက အနောက်ပိုင်းတိုင်း စစ်ဌာနချုပ် တိုင်းမှူးထံသို့ ပြီးခဲ့သည့် ရက်ပိုင်းအတွင်း၌ စာပို့ တင်ပြ ထားကြောင်း သိရသည်။

လက်ရှိ အပစ်ရပ်နေသည့် ကာလအတွင်း စခန်းအသီးသီးသို့ ရောက်ရှိနေကြသည့် စစ်ဘေးရှောင်များအတွက် ပြီးခဲ့သည့် ဒီဇင်ဘာလက မြို့နယ် စခန်းအလိုက် လူဦးရေစာရင်းများ ကောက်ခံခဲ့ရာတွင် စစ်ဘေးရှောင်များကဘက်မှ လုံခြုံစိတ်ချမှု ရှိရေးဆောင်ရွက်ပေးရန် တင်ပြမှုများရှိသည့်အတွက် ယင်းသို့ ဆောင်ရွက်ရခြင်းဖြစ်ကြောင်း ပြည်နယ် အစိုးရထံက သိရ သည်။

ရခိုင်ပြည်နယ် အစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး မင်းသန်းက “တိုင်းစစ်ဌာနချုပ်ကနေ သွားလို့ ရတဲ့ မြို့နယ်တွေ၊ ရွာတွေ ရပ်ကွက်စတဲ့ နေရာတွေကို သူတို့ စိစစ်မယ်။ စိစစ်တယ်ဆိုတာ အန္တရာယ်ကင်းအောင်ပေါ့။ အန္တရာယ်ကင်းလို့ရှိရင် ပြန်မယ်။ တိုင်းမှူးကြီးနဲ့တော့ နှုတ်နဲ့ အလွတ်သဘော ပြောထားတာ ရှိပါတယ်။ သူခရီးသွားနေလို့ သူပြန်လာရင် လုပ်ပေးမယ်ပေါ့။ စာကတော့ ပို့ပြီးပြီ” ဟု ဇန်နဝါရီလ ၁၅ ရက်က ပြုလုပ်ခဲ့သည့် ဒုတိယကြိမ်မြောက် ရခိုင် ပြည်နယ် လွှတ်တော် ၁၅ ကြိမ်မြောက် ပုံမှန်အစည်းအဝေးတွင် ပြောဆိုခဲ့ခြင်း ဖြစ်သည်။

ယင်းသို့ တိုင်းမှူးဆီသို့ စာပို့ရန်အတွက် ပြီးခဲ့သည့် ရက်ပိုင်းက ပြည်နယ်အစိုးရအဖွဲ့ အစည်းအဝေးလုပ်ကာ ဆုံးဖြတ်ခဲ့ခြင်း ဖြစ်သလို မြို့နယ်ကျေးရွာအလိုက် နေရပ်ပြန်မည့်သူများ စာရင်းကိုလည်း ပေးထားကာ ၎င်းတို့ပြန်လျှင် အကူအညီ အထောက်အပံ့များ ပေးသွားမည် ဟုလည်း သိရသည်။

ဆက်လက်ပြီး ဗိုလ်မှူးကြီး မင်းသန်းက “လက်ရှိ တိုက်ပွဲရှောင်တွေ နေရပ်ပြန်နိုင်ရေးအတွက်ကို တိုက်ပွဲငြိမ်သွားတဲ့ နိုဝင် ဘာပေါ့။ ဒီဇင်ဘာလမှာ ပိုပြီး ငြိမ်သွားတယ်ဆိုတော့ ဝန်ကြီးချုပ်နဲ့ တိုင်ပင်ပြီးတော့ တိုက်ပွဲရှောင်တွေ ပြန်လို့ရအောင်ဆိုပြီး စီမံချက် ချရမယ်ဆိုပြီး လုပ်တယ်ပေါ့။ အဓိကတော့ သူတို့ပြန်ရင် ကျနော်တို့ဘက်က ဆန်ဘယ်လောက်ပေးမလဲ။ နောက် ထပ်ပြီးတော့ နောက်ဆက်တွဲ အကူအညီတွေ ဘယ်လို လိုက်လုပ်မလဲ။ ဒါမျိုးတွေပေါ့” ဟု ပြောကြားသည်။

အစိုးရ အဖွဲ့ထံသို့ နေရပ်ပြန်ရန် စာရင်းပေးထားသည့် စစ်ဘေးရှောင်များမှာ စစ်တွေမြို့နယ်တွင်၂၀၁ ဦး၊ ပုဏ္ဏားကျွန်း မြို့ နယ်တွင် ၁၁၇ ဦး၊ ကျောက်တော်မြိုနယ်တွင် ၉၈၉၃ ဦးနှင့် အမ်းမြိုနယ်တွင် ၂၂၀၂ ဦး စုစုပေါင်း လူဦးရေ ၁၂၄၁၃ ဦး ရှိ ကြောင်းလည်း ဗိုလ်မှူးကြီးမင်းသန်း ပြောကြားချက်အရ သိရသည်။

၂၀၁၈ နိုဝင်ဘာလကုန်ပိုင်းမှာ စတင်ကာ ရခိုင်မြောက်ပိုင်းနှင့် ချင်းပြည်နယ် ပလက်ဝဒေသတို့တွင် တိုက်ပွဲများ ဆက် တိုက် ပြင်းထန်စွာ တိုက်ခိုက်ခဲ့ကြသည့် တပ်မတော်နှင့် AA တို့မှာ နိုဝင်ဘာလကနေ ယနေ့အချိန်ထိ နှစ်ဖက်တပ်များ ရွေး ကောက်ပွဲ ဖြစ်စဉ်များကြောင့် အပစ်အခတ် ရပ်စဲထားကြသည့်အတွက် စစ်ဘေးရှောင်တို့မှာ အိမ်ပြန်ချင်နေကြခြင်း ဖြစ် သည်။

စစ်ဘေးရှောင်များအနေဖြင့် အပစ်ရပ်နေသည့် ကာလအတွင်း အစိုးရ စာရင်းကောက်ခြင်းကို စာရင်းမပေးတော့ဘဲ မိမိ အစီစဉ်ဖြင့် အိမ်ပြန်နေသူတို့လည်း ရှိနေကြသည်။

ရသေ့တောင်မြို့ ရွှေပါရမီ စစ်ရှောင်စခန်းတွင် ခိုလှုံနေသည့် ညောင်ပင်လှကျေးရွာမှ ဦးဦးထွန်းလှိုင်က “ကျနော်က ရွာမှာ အိမ်တွေက အကုန်လုံး ပြိုပျက်နေတယ်ဆိုတော့ သွားလုပ်တာ။ စပါးရိတ်သိမ်းကြတာပေါ့။ တခြားလူတွေလည်း စခန်းက နေ ရွာကိုသွားလိုက်လာလိုက် လုပ်နေကြတယ်။ ရွာမှာတော့ အခု အေးဆဲတည်ငြိမ်နေတယ် ဆိုပေမယ့် အတည်တကျ နေဖို့ အတွက်ကတော့ စိုးရိမ်စိတ်တွေ ရှိတယ်” ဟု ဆိုသည်။

လက်ရှိ နေရပ်ပြန်မည့်သူတို့အား ၎င်းတို့ လွတ်စွာနေထိုင်ရန်အတွက် ဆက်သွယ်ရေးလမ်းကြောင်းများ၊ စီးပွားရေး အခွင့် အလမ်းများကိုပါ ဖန်တီးရမည် ဖြစ်သလို ကျေးရွာအတွင်း လက်နက်ကိုင် တပ်စွဲနေထိုင်မှုကိုလည်း ထွက်ခွာပေးရန် အစိုးရ က အဓိက လုပ်ပေးရမည်ဖြစ်ကြောင်း ဒေသခံ လွှတ်တော်ကိုယ်စားလှယ်များက ထောက်ပြနေကြသည်။

အမျိုးသား လွှတ်တော် ကိုယ်စားလှယ် ဦးခင်မောင်လတ်က “သူတို့အိမ်ပြန်မယ့် လမ်းကြောင်းက ဖြောင့်တန်းဖို့ လိုတယ်။ တချို့နေရာတွေမှာ စစ်ဆေးမှုတွေ ထူပြောတယ်။ အဲဒီမှာ လမ်းကြောင်းက တခါသွား ရှင်းနေလို့မရသေးဘူး။ အမြဲတမ်း ကျန်းမာရေး၊ လူမှုရေးဖြစ်စဉ်တွေအတွက် လွတ်လပ်စွာ သွားလာခွင့် ရဖို့လိုတယ်။ နောက်ပြီးတော့ တချို့ကျေးရွာအတွင်း လက်နက်ကိုင် တပ်စွဲနေထိုင်မှုတွေရှိတဲ့ ဘုန်းကြီးကျောင်း၊ စာသင်ကျောင်းတို့ကနေ ထွက်ပေးရေးတို့ လုပ်ပေးရမယ်” ဟု ဆိုသည်။

ရခိုင်တိုင်းရင်းသား မျိုးနွယ်များ အစည်းအရုံး (REC) ဥက္ကဋ္ဌ ဦးရွှေဘော်စိန်က လက်ရှိ စစ်ဘေးရှောင်တို့မှာ နေရပ်ပြန်သွား ကြသော်လည်း တချို့မှာ ကျေးရွာအနီး လက်နက်ကိုင်တပ်ဖွဲ့များ ရှိနေသည့်အတွက် မသွားရဲသည့် အခြေအနေ ရှိနေ ကြောင်း ဆိုသည်။

ဦးရွှေဘော်စိန်က “တိုက်ပွဲငြိမ်နေတာ ကောင်းတဲ့လက္ခဏာ ဆိုပေမယ့်လည်း လုံးဝ ငြိမ်းချမ်းသွားပြီလို့ ပြောမရသေးဘူး ပေါ့။ နှစ်ဖက် လက်နက်ကိုင်တွေက သူတို့ရဲ့ နယ်မြေထဲမှာ ရှိနေတာ။ ပဋိပက္ခ ပြန်ဖြစ်လာနိုင်တဲ့အတွက် စိုးရိမ်စိတ်တွေ ရှိနေကြတယ်။ ဒါကြောင့် နှစ်ဖက်စလုံး ခေါင်းဆောင်ပိုင်းတွေက ပြေလည်မှု၊ ခိုင်မာတဲ့ သဘောတူညီမှု တခုကို မတည် ဆောက်သမျှ ကာလပတ်လုံး ပြဿနာတွေ ရှိနေဦးမယ်” ဟု ဆိုသည်။

ရခိုင်တွင် စစ်ဘေးရှောင်ဦးရေမှာ ပြီးခဲ့သည့် နိုဝင်ဘာက ၂၃၄၉၁၅ ရှိခဲ့ရာမှ ယနေ့ စစ်ဘေးရှောင် ၁၈၅၆၃၁ ဦးသာ ရှိ တော့သည့်အတွက် အပစ်ခတ် ရပ်စဲနေသည့် ကာလအတွင်း စစ်ဘေးရှောင် ၅၀၀၀၀ ခန့် နေရပ်ပြန်ခဲ့ကြပြီဖြစ်ကြောင်း စစ်ဘေးရှောင်စာရင်းကောက်ယူနေသည့် ရခိုင်တိုင်းရင်းသား မျိုးနွယ်များအစည်းအရုံး က သိရသည်။

https://www.facebook.com/121507374560090/posts/4126727414038046/