ပြည်နယ်အစိုးရဦးဆောင်ဖွဲ့စည်းခွင့်ပေးရန် ရခိုင်အမျိုးသားပါတီ တောင်းဆို ပြီးခဲ့သည့်လွှတ်တော်သက်တမ်းကဲ့သို့ ပြည်နယ်အစိုးရနှင့် ပြည်နယ်လွှတ်တော်ကြား ပွတ်တိုက်မှုများ မရှိစေရန် အစိုးရအဖွဲ့ကို ဦးဆောင်ဖွဲ့စည်းလိုခြင်း ဖြစ်သည်ဟု ရခိုင်အမျိုးသားပါတီတာဝန်ရှိသူတစ်ဦးက ဆိုသည်

By Myanmar Now/ 2021 January 7

ဖဒူထွန်းအောင်

၂၀၂၀ ရွေးကောက်ပွဲ မဲဆွယ်စည်းရုံးရေးကာလအတွင်း စစ်တွေမြို့၌ မဲဆွယ်နေသည့် ရခိုင်အမျိုးသားပါတီဝင်များကို တွေ့ရစဉ် (ဓာတ်ပုံ – ဖဒူ ထွန်းအောင် / Myanmar Now)

၂၀၂၀ ရွေးကောက်ပွဲတွင် ရခိုင်အမျိုးသားပါတီ (ANP) က ရခိုင်ပြည်နယ်၌ မဲဆန္ဒနယ်နေရာ အများဆုံး အနိုင်ရရှိခဲ့သောကြောင့် ပြည်နယ်အစိုးရအဖွဲ့သစ် ဦးဆောင်ဖွဲ့စည်းခွင့်ပေးရန် ပါတီ၏ မူဝါဒရေးရာ ဦးဆောင်ကော်မတီဝင် ဦးထွန်းအောင်ကျော်က တောင်းဆိုလိုက်သည်။

ANP သာ ပြည်နယ်အစိုးရဖွဲ့စည်းခွင့် ရရှိပါက ပြီးခဲ့သည့် လွှတ်တော်သက်တမ်းကဲ့သို့ ပြည်နယ်အစိုးရနှင့် ပြည်နယ်လွှတ်တော်ကြားတွင် ကန့်လန့်တိုက်မှုများ ဖြစ်ပေါ်မည်မဟုတ်ဘဲ အစိုးရအဖွဲ့၏ လုပ်ငန်းစဉ်များကို ညီညီညွတ်ညွတ်ဖြင့် အကောင်အထည်ဖော်နိုင်မည်ဟု ရာနှုန်းပြည့်ယုံကြည်ကြောင်း ဦးထွန်းအောင်ကျော်က ဆိုသည်။

ANP သည် ၂၀၁၅ ရွေးကောက်ပွဲတွင်လည်း ရခိုင်ပြည်နယ်၌ အများဆုံးအနိုင်ရရှိခဲ့သော်လည်း ပြည်နယ်အစိုးရအဖွဲ့ကို ဦးဆောင်ဖွဲ့စည်းခွင့် မရရှိခဲ့သဖြင့် အတိုက်အခံပါတီအဖြစ်ရပ်တည်ခဲ့ရာ အမျိုးသားဒီမိုကရေစီအဖွဲ့ချုပ် (NLD) ဦးဆောင်သော ပြည်နယ်အစိုးရနှင့် ANP ကိုယ်စားလှယ်များ လွှမ်းမိုးထားသည့် ပြည်နယ်လွှတ်တော်ကြား ပွတ်တိုက်မှုများ ဖြစ်ပေါ်ခဲ့သည်။

“တကယ်လို့များ အမျိုးသားဒီမိုကရေစီအဖွဲ့ချုပ်ကလည်း ကျွန်တော်တို့နဲ့ တွဲပြီးတော့လုပ်မယ်လို့ အခြေအနေတွေ ပေးလာရင် ကျွန်တော်တို့ အမြင့်ဆုံးရည်မှန်းထားတာက ရခိုင်ပြည်နယ်အစိုးရဖွဲ့ပြီးတော့မှ ငြိမ်းချမ်းရေး၊ တည်ငြိမ်မှု၊ ဖွံ့ဖြိုးမှုတွေအတွက် လုပ်နိုင်ကိုင်နိုင်တဲ့သူတွေ ပါတီမှာ အများကြီးရှိပါတယ်။ အဲဒါကြောင့် ကျွန်တော်တို့ (ပြည်နယ်) အစိုးရဖြစ်ချင်တယ်” ဟု ဦးထွန်းအောင်ကျော်က Myanmar Now ကို ပြောသည်။

ပြီးခဲ့သည့် အစိုးရသက်တမ်းအတွင်း ပြည်နယ်တွင်းတိုက်ပွဲများကြောင့် ရပ်ရွာများ မီးရှို့ဖျက်ဆီးခံရမှုများ၊ ပြည်သူများ အသက်ဆုံးရှုံးမှုများနှင့် ပတ်သက်ပြီး မလုပ်ဆောင်ပေးနိုင်ခဲ့ကြောင်း၊ လာမည့်သက်တမ်းအတွင်း အလားတူအခက်အခဲများ မဖြစ်ပေါ်လာစေရန် စီမံခန့်ခွဲခွင့်အာဏာရလိုခြင်းဖြစ်သည်ကို အာဏာရပါတီ NLD က တိုင်းရင်းသားညီအစ်ကိုစိတ်ဓာတ် အပြည့်အဝထား၍ ထောက်ဆချင့်ချိန်ပေးစေလိုကြောင်း ၎င်းက ဆိုသည်။​

“ရခိုင်အကြောင်းကို မသိတဲ့သူတွေ လာပြီးတော့ အစိုးရလုပ်လို့ မရဘူးဗျာ။ တကယ့်တကယ် ရခိုင်မှာမွေးပြီးတော့ ရင်ဘတ်ချင်းနီးစပ်နေတဲ့ လူတွေက စီမံခန့်ခွဲနိုင်တဲ့ အာဏာရမှပဲ ဖြစ်ပါလိမ့်မယ်။ အဲဒါကြောင့် ကျွန်တော်တို့ မေတ္တာရပ်ခံချင်တယ်” ဟု ဦးထွန်းအောင်ကျော်က ပြောသည်။

ရခိုင်အမျိုးသားပါတီအနေဖြင့် အမျိုးသားအကျိုးစီးပွားဖော်ဆောင်နိုင်ရန်အတွက် တတ်နိုင်သည့်နည်းလမ်းဖြင့် ပြည်နယ်အစိုးရဖွဲ့စည်းခွင့်ရရှိအောင် ဆောင်ရွက်သွားမည်ဟု ၎င်းက ဆိုသည်။

ANP သည် ကမန်၊ မြို၊ ခမီ၊ မရမာကြီး စသည့် ရခိုင်မျိုးနွယ်စုဝင်ခေါင်းဆောင်များ၊ အခြားရခိုင်တိုင်းရင်းသားနိုင်ငံရေးပါတီခေါင်းဆောင်များနှင့်လည်း ယနေ့ (ဇန်နဝါရီ ၇) တွင် စစ်တွေမြို့၌ တွေ့ဆုံခဲ့ကာ မျိုးနွယ်စုဝင်များ၏ အခက်အခဲများနှင့် ပြည်နယ်အတွင်း လက်ရှိကြုံတွေ့နေရသည့် နိုင်ငံရေး၊ စစ်ရေးအခြေအနေများကို ဆွေးနွေးခဲ့ကြသည်။

ယင်းအစည်းအဝေးတွင် ANP သည် ပြည်နယ်အစိုးရ ဖွဲ့စည်းခွင့်ရရှိပါက ရခိုင်မျိုးနွယ်စုများ၏ အခက်အခဲအများစုကို ဖြေရှင်းပေးနိုင်မည်ဟု ပြောဆိုခဲ့ကြောင်း မရမာကြီးမျိုးနွယ်စုခေါင်းဆောင် ဦးမောင်နုက Myanmar Now ကို ပြောသည်။

“ရခိုင်ပြည်နယ်မှာ ရခိုင်ပါတီက မဲအများဆုံး ရရှိခဲ့တဲ့အတွက် ရခိုင်ပါတီကို အစိုးရဖွဲ့ခွင့်ပေးပါ။ ရခိုင်ပြည်နယ်မှာ ရခိုင်ပါတီက အစိုးရဖွဲ့ခွင့်ရမှ တိုင်းရင်းသားလူမျိုးစုတွေရဲ့ ဒုက္ခ၊ သုက္ခကို သိမှာ။ NLD က သိမှာမဟုတ်ဘူး။ ဖြစ်အောင်လုပ်ပေးပါ။ တောင်းဆိုပါတယ်” ဟု ဦးမောင်နုက ပြောသည်။

ရခိုင်အမျိုးသားပါတီအနေဖြင့် ပြည်နယ်အစိုးရဖွဲ့စည်းခွင့်ရရန် တောင်းဆိုပိုင်ခွင့်ရှိသော်လည်း ယင်းတောင်းဆိုချက်အတိုင်း လုပ်ဆောင်ပေးနိုင်ခြင်း ရှိမရှိမှာမူ ညှိနှိုင်းဆွေးနွေးရမည့်ကိစ္စရပ်ဖြစ်သည်ဟု NLD ပါတီပြောခွင့်ရပုဂ္ဂိုလ် ဒေါက်တာမျိုးညွန့်က ဆိုသည်။

“ဒီတိုင်းရင်းသားအရေးကိစ္စက အလွန်နူးညံ့ပါတယ်။ ဒါကြောင့် နူးညံ့တဲ့ကိစ္စတွေဖြစ်တဲ့အတွက် လက်တွေ့ပါဝင်ခြင်း မပြုခင်မှာတော့ ဘယ်လိုမှတ်ချက်မှ မပေးချင်ပါဘူး” ဟု ဒေါက်တာမျိုးညွန့်က ပြောသည်။

၂၀၂၀ ‌အထွေထွေရွေးကောက်ပွဲတွင် ရခိုင်ပြည်နယ်အတွင်း ပြည်ထောင်စုနှင့် ပြည်နယ်လွှတ်တော် ၂၈ နေရာအနက် ANP က ပြည်သူ့လွှတ်တော် ၄ နေရာ၊ အမျိုးသားလွှတ်တော် ၄ နေရာ၊ ပြည်နယ်လွှတ်တော် ၇ နေရာဖြင့် အများဆုံးအနိုင်ရရှိခဲ့ပြီး NLD က ပြည်သူ့လွှတ်တော် ၂ နေရာ၊ အမျိုးသားလွှတ်တော် ၁ နေရာ၊ ပြည်နယ်လွှတ်တော် ၅ နေရာဖြင့် ဒုတိယအများဆုံး အနိုင်ရရှိခဲ့သည်။

https://www.facebook.com/518067831674293/posts/1983999211747807/

Leave a Reply

Your email address will not be published.